കൊച്ചി: ട്രെയിനില് തലകറങ്ങി വീണ യുവതിയ്ക്ക് അടിയന്തിരസഹായമെത്തിക്കാതെ റെയില്വേയുടെ ക്രൂരത. ഷാലിമാര് തിരുവനന്തപുരം എക്സ്പ്രസില് വ്യാഴാഴ്ച വൈകിട്ട് തലകറങ്ങി വീണ യുവതിയെ ആശുപത്രിയില് എത്തിക്കാന് സഹായം തേടിയ സഹയാത്രികരോട് ചോദ്യശരങ്ങള്കൊണ്ടാണ് റെയില്വേ ഹെല്പ് ലൈന് നമ്പരുകള് സ്വീകരിച്ചത്.
യുവതി എറണാകുളത്തുനിന്നു ആലപ്പുഴയിലേക്ക് ഒറ്റയ്ക്കു യാത്ര ചെയ്യുകയായിരുന്നു. വാതിലിനു സമീപം നിന്നിരുന്ന ഇവര് തലകറങ്ങി അടുത്തനിന്ന യാത്രക്കാരുടെ ഇടയിലേക്കു വീഴുകയായിരുന്നു. തുറവൂരിനു മുന്പായിരുന്നു സംഭവം.
റെയില്വേ ഹെല്പ് ലൈന് നമ്പരായ 182ല് വിളിച്ചപ്പോള് അത് സുരക്ഷാ സേനയുടെ നമ്പരാണ് 138ല് വിളിക്കാനായിരുന്നു മറുപടി. 138ല് വിളിച്ചപ്പോഴാണു യാത്രക്കാര് ശരിക്കും വെട്ടിലായത്. ചോദ്യങ്ങളുടെ നീണ്ട പട്ടികയാണു ഉദ്യോഗസ്ഥര് നല്കിയത്.
പെണ്കുട്ടിക്ക് എത്ര വയസുണ്ട്, വിലാസം, എന്താണ് അസുഖം തുടങ്ങിയ ചോദ്യങ്ങള്ക്കു മുന്പില് സഹായം തേടി വിളിച്ചവര് കുടുങ്ങി.
പെണ്കുട്ടി ഒറ്റയ്ക്കാണു യാത്ര ചെയ്യുന്നതെന്നു പറഞ്ഞെങ്കിലും റെയില്വേ ഉദ്യോഗസ്ഥ ചോദ്യങ്ങള് ആവര്ത്തിച്ചു. ടിടിഇയോടു തിരുവനന്തപുരത്തേക്കു വിളിക്കാനായിരുന്നു ആദ്യ നിര്ദേശം.
ജനറല് കോച്ചില് ടിടിഇയില്ലെന്നു പറഞ്ഞതോടെ ഫോണെടുത്തവര്ക്ക് ഉത്തരമില്ലാതായി. സഹികെട്ട യാത്രക്കാര് ഒടുവില് തുറവൂരില് എത്തിയപ്പോള് ലോക്കോപൈലറ്റിനെ പോയി കണ്ടു. യുവതിയെ മറ്റൊരു യാത്രക്കാരിക്കൊപ്പം ചേര്ത്തലയില് ഇറക്കി.
Discussion about this post