കോഴിക്കോട്: ‘എന്റെ കാര്യങ്ങളെല്ലാം അവനറിയാം… ഒപ്പം ജീവിക്കാന് കഴിയില്ല… എന്റെ ഇഷ്ടപ്രകാരമാണ് ഇത് ചെയ്യുന്നത്..’ ജീവനൊടുക്കും മുന്പ് മേഘ എഴുതിവച്ച വരികളാണിത്. വിവാഹത്തിന് മണിക്കൂറുകള് ശേഷിക്കെയാണ് മേഘ (30) ജീവനൊടുക്കിയത്.
സ്വകാര്യ ആശുപത്രിയിലെ നഴ്സിങ് വിദ്യാര്ഥിയായ കളാണ്ടിതാഴം നങ്ങോലത്ത് വീട്ടില് മേഘ (30) യാണ് കഴിഞ്ഞ ദിവസം കിടപ്പുമുറിയില് ആത്മഹത്യ ചെയ്ത നിലയില് കണ്ടെത്തിയത്. വിവാഹദിനത്തില് അണിഞ്ഞൊരുങ്ങുന്നതിന്നു തൊട്ടുമുന്പാണ് മേഘ ആത്മഹത്യ ചെയ്തത്. ദുരൂഹതയുള്ള കുറിപ്പില് അന്വേഷണം ആരംഭിച്ചെന്ന് ചേവായൂര് ഇന്സ്പെക്ടര് പി ചന്ദ്രമോഹന് പറഞ്ഞു.
വെളുപ്പിന് ബ്യൂട്ടിഷ്യന് എത്തിയപ്പോള് കുളിച്ചു വരാമെന്നു പറഞ്ഞ് മേഘ മുറിക്കകത്തു കയറി വാതിലടച്ചു. ഏറെ നേരം കഴിഞ്ഞിട്ടും പുറത്തിറങ്ങിയില്ല. വീട്ടുകാര് വിളിച്ചിട്ട് വാതില് തുറക്കാത്തതിനാല് ശുചിമുറിയുടെ ജനല്ചില്ലു പൊട്ടിച്ചു നോക്കിയിട്ടു കണ്ടില്ല.
ഒടുവില് മുറിയുടെ ജനല്ചില്ലു പൊട്ടിച്ചു നോക്കിയപ്പോള് ഫാനില് കെട്ടിത്തൂങ്ങിയ നിലയിലായിരുന്നു. ഉടന് വാതില് ചവിട്ടിത്തുറന്ന് മെഡിക്കല് കോളജ് ആശുപത്രിയില് എത്തിച്ചെങ്കിലും രക്ഷിക്കാനായില്ല.
പ്രാഥമിക അന്വേഷണത്തില്, തലേദിവസം വരെ വീട്ടില് ഒരു പ്രശ്നവുമുണ്ടായിരുന്നില്ലെന്നു പോലീസ് പറഞ്ഞു. മേഘ പഠിക്കുന്ന ആശുപത്രിയിലെ സ്റ്റാഫ് നഴ്സുമായാണ് വിവാഹം നിശ്ചയിച്ചത്. വിവാഹം വധൂഗൃഹത്തിലായതിനാല് കല്യാണ മണ്ഡപവും മറ്റു സൗകര്യങ്ങളും ഒരുക്കിയിരുന്നു.
Discussion about this post