കല്പറ്റ: സുല്ത്താന് ബത്തേരി കോഴക്കേസുമായി ബന്ധപ്പെട്ട ശബ്ദ പരിശോധന കേന്ദ്ര ലാബില് നടത്തണമെന്ന ആവശ്യവുമായി ബിജെപി സംസ്ഥാന അധ്യക്ഷന് കെ സുരേന്ദ്രന്. അഭിഭാഷകന് മുഖേന സുരേന്ദ്രന് ബത്തേരി ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതിയില് ഹര്ജി സമര്പ്പിച്ചു. തിങ്കളാഴ്ച ഹര്ജി കോടതി പരിഗണിക്കും.
വിഷയത്തില് സര്ക്കാരിന്റെ നിലപാട് അറിയിക്കാന് കോടതി ആവശ്യപ്പെട്ടു. നിലവില് സംസ്ഥാന സര്ക്കാരിന് കീഴിലുള്ള തിരുവനന്തപുരത്തെ ഫോറന്സിക് ലാബിലായണ് ശബ്ദ സാമ്പിളുകള് പരിശോധന നടത്തുന്നത്. എന്നാല് കേസ് അട്ടിമറിക്കാന് സാധ്യതയുണ്ടെന്നും വിശ്വാസ്യതയില്ലെന്നുമാണ് സുരേന്ദ്രന്റെ വാദം. സംസ്ഥാനത്തെ ലാബുകളേക്കാള് വിശ്വാസ്യത കേന്ദ്ര സര്ക്കാറിനു കീഴിലുള്ള ഫോറന്സിക് ലാബുകള്ക്കാണെന്നും സംസ്ഥാനത്തെ ലാബുകളില് കൃത്രിമം നടത്താനുള്ള സാധ്യതയുണ്ടെന്നും സുരേന്ദ്രന് ഹര്ജിയില് പറയുന്നു.
കോടതി ഉത്തരവിനെ തുടര്ന്ന് കഴിഞ്ഞ ഒക്ടോബര് 11ന് സുരേന്ദ്രനും കേസിലെ മുഖ്യസാക്ഷി പ്രസീത അഴീക്കോടും കാക്കനാട് ചിത്രാഞ്ജലി സ്റ്റുഡിയോയിലെത്തി ശബ്ദ സാമ്പിള് നല്കിയിരുന്നു. കേസ് അന്വേഷിക്കുന്ന വയനാട് ക്രൈം ബ്രാഞ്ച് നല്കിയ ഹര്ജിയെ തുടര്ന്നായിരുന്നു ഉത്തരവ്.
Discussion about this post