നടന് മുകേഷിനെ ഫോണ് വിളിച്ച് പറ്റിച്ച കഥ പങ്കുവച്ച് നടി മേനക. മേനകയും ലിസിയും ചേര്ന്നാണ് ഷൂട്ടിംഗിനിടെ മുകേഷിന് എട്ടിന്റെ പണികൊടുത്തത്. ബിഹൈന്ഡ് വുഡ്സിന് നല്കിയ അഭിമുഖത്തിലാണ് മേനക ഓര്മ്മ പങ്കുവയ്ക്കുന്നത്.
”സിനിമയുടെ ഭാഗമായി ഞങ്ങള് അമൃത ഹോട്ടലില് നില്ക്കുന്ന സമയം. ഞാനും ലിസിയുമെല്ലാമുണ്ട്. അങ്ങനെയിരിക്കെയാണ് മുകേഷേട്ടനെ ഒന്ന് പറ്റിക്കാമെന്ന് ഞങ്ങള് തീരുമാനിക്കുന്നത് അങ്ങനെ റൂമിലുള്ള ഫോണെടുത്ത് അദ്ദേഹത്തെ വിളിച്ച്, ചേട്ടാ ഞാന് ചേട്ടന്റെ വലിയ ആരാധികയാണെന്നും ചേട്ടനെ ഭയങ്കര ഇഷ്ടമാണെന്നും ഒന്നു കാണമെന്നും എല്ലാം പറഞ്ഞു.
ഇതോടെ മുകേഷും ഇങ്ങോട്ട് സംസാരിച്ചു. ഞാന് ഒരു പച്ചക്കളര് ചുരിദാറാണ് ധരിച്ചിരിക്കുന്നതെന്നും തൈക്കാട് ബസ് സ്റ്റോപ്പില് വന്ന് നില്ക്കാമെന്നും ചേട്ടന് വരണമെന്നും ചേട്ടനെ കണ്ടേ പറ്റൂവെന്നും ഒക്കെ പറഞ്ഞു. മുകേഷേട്ടനും കാര്യമായിട്ട് തന്നെ സംസാരിച്ചു. അങ്ങനെ ഏറ്റവും അവസാനം ‘മറുപടി’ കാണാം എന്ന് ഞാന് പറഞ്ഞു. അങ്ങനെ ഞാന് ഫോണ്വെച്ച് ഞങ്ങള് ഭയങ്കരമായി ചിരിച്ചു. പറ്റിച്ചല്ലോ എന്ന് ഓര്ത്തിട്ട്.
മുകേഷേട്ടന് ഇപ്പോള് ബസ് സ്റ്റോപ്പിലേക്ക് ഓടും പച്ച ചുരിദാറും നോക്കിക്കൊണ്ട് എന്ന് പറഞ്ഞ് ലിസിയും ഭയങ്കര ചിരി. കുറച്ചുകഴിഞ്ഞപ്പോള് ഞങ്ങളുടെ റൂമില് ഒരു ഫോണ് വന്നു. ഹലോ ഞാന് മുകേഷാണ് എന്ന് പറഞ്ഞു. ഞാന് മേനകയാണ് എന്താണെന്ന് ചോദിച്ചു. മേനക ഇപ്പോള് എന്നെ വിളിച്ചിരുന്നോ എന്നായി പുള്ളി. ഇല്ല ഞാന് വിളിച്ചില്ല. എന്തായിരുന്നു എന്ന് ഞാന് ചോദിച്ചു.
അല്ല, നീ കുറച്ചുമുന്പേ എന്നെ വിളിച്ചെന്നായി വീണ്ടും. ഇല്ല വിളിച്ചില്ലെന്ന് പറഞ്ഞപ്പോള് പച്ച ചുരിദാറിട്ട് വരാമെന്ന് പറഞ്ഞത് നീയല്ലേ എന്ന് ചോദിച്ചപ്പോഴേക്ക് ഞങ്ങള് അങ്ങ് ചിരിച്ചു പോയി. അപ്പോള് പുള്ളി പറഞ്ഞു. നീ പറഞ്ഞ ആ അവസാനത്തെ വാക്കിലാണ് ഞാന് പിടിച്ചത്. അതെന്താണെന്ന് ചോദിച്ചപ്പോള് നീ മറുപടി കാണാമെന്ന് പറഞ്ഞു.
മറുപടി എന്ന് പറയുന്നത് മലയാള വാക്കല്ല. അത് തമിഴാണ്. മലയാളത്തില് മറുപടി എന്ന് പറഞ്ഞാല് ഉത്തരമാണ്. ഞാന് മറുപടി എന്ന് അവിടെ പറഞ്ഞത് വീണ്ടും കാണാം എന്ന അര്ത്ഥത്തിലായിരുന്നു.
നീ ആ വാക്ക് പറഞ്ഞതോടെയാണ് ഞാന് ഈ ശബ്ദം എവിടെയോ കേട്ടിട്ടുണ്ടല്ലോ എന്ന് ഓര്ക്കുന്നത്. ആ തമിഴ് ടച്ച് പിടികിട്ടിയതോടെ ആളെ മനസിലായി. അല്ലെങ്കില് ഇപ്പോള് ബസ് സ്റ്റോപ്പില് പോയി പച്ച ചുരിദാര്, പച്ച ചുരിദാര് എന്ന് പറഞ്ഞ് ഞാന് നിന്നേനെ എന്നും മുകേഷ് പറഞ്ഞു, മേനക ചിരിയോടെ പറഞ്ഞു നിര്ത്തി.
പപപ
Discussion about this post