തിരുവനന്തപുരം: മുഖ്യമന്ത്രി പിണറായി വിജയന് ഫെബ്രുവരി മൂന്നാംവാരം വീണ്ടും യുഎഇ സന്ദര്ശിക്കുമെന്ന് വിവരം. പ്രവാസ ലോകത്തെ ലോക കേരളസഭയുടെ സമ്മേളനത്തില് പങ്കെടുക്കാനാണ് അദ്ദേഹം യാത്ര തിരിക്കുന്നത്. അതിനൊപ്പം തന്നെ പ്രളയത്തില് തകര്ന്ന കേരളത്തെ പടുത്തുയര്ത്തുവാനുള്ള ധന സമാഹരണം സംബന്ധിച്ച തുടര്പ്രവര്ത്തനങ്ങളുടെ അവലോകനവും മുഖ്യമന്ത്രിയുടെ സാന്നിധ്യത്തില് നടക്കും.
അടുത്ത ജൂണ്മാസത്തോടെ അഞ്ഞൂറുകോടി രൂപ സമാഹരിക്കാന് ഈയിടെ മുഖ്യമന്ത്രി നടത്തിയ നാലുദിവസത്തെ യുഎഇ പര്യടനത്തില് തീരുമാനിച്ച് ഉറപ്പിച്ചിരുന്നു. ഓരോ എമിറേറ്റുകളിലും ഇതിനായി പ്രത്യേകകമ്മിറ്റിക്കും രൂപം നല്കിയിട്ടുണ്ട്. ഇതിന്റെ തുടര്പ്രവര്ത്തനങ്ങളുടെ അവലോകന യോഗം 22-ന് ശനിയാഴ്ച ദുബായിയില് നടക്കും.
ഹോട്ടല് സ്റ്റീഗന്ബര്ഗില് നടക്കുന്ന ആലോചനയോഗത്തില് മുഖ്യമന്ത്രിയുടെ പ്രിന്സിപ്പല് സെക്രട്ടറി ഡോ. ഇളങ്കോവന്, നോര്ക്ക റൂട്സ് സിഇഒ ഹരികൃഷ്ണന് നമ്പൂതിരി, നോര്ക്ക വൈസ് ചെയര്മാന് എംഎ യൂസഫലി തുടങ്ങിയ പ്രമുഖര് സംബന്ധിക്കും. യുഎഇയിലെ ലോക കേരള സഭാംഗങ്ങള് ഉള്പ്പെടെയുള്ള മറ്റ് സംഘടനാഭാരവാഹികളും പങ്കെടുക്കുന്നുണ്ട്.
Discussion about this post