ലോകത്തെ തന്നെ വരിഞ്ഞുമുറുക്കുന്ന കൊവിഡ് മഹാമാരിക്ക് മുന്‍പ് കോഴിക്കോട് നഗരത്തെ വിറപ്പിച്ച വൈറസാണ് നിപ്പാ. ആ ഓര്‍മ്മകളില്‍ തീരാനൊമ്പരമാണ് നഴ്സ് ലിനി. നിപ്പാ രോഗികളെ പരിചരിച്ച് ഒടുവില്‍ ലിനി നടന്ന് കയറിയത് മരണത്തിലേയ്ക്കായിരുന്നു. ആ ത്യാഗം ഇന്നും നിറകണ്ണുകളോടെയാണ് കേരളം ഓര്‍ക്കുന്നത്. ലിനി വിടപറഞ്ഞ് ഇന്നേയ്ക്ക് മൂന്ന് വര്‍ഷങ്ങള്‍ പിന്നിടുകയാണ്.
ഈ നാളില്‍ നൊമ്പരകുറിപ്പുമായി ഭര്‍ത്താവ് സജീഷ് രംഗത്തെത്തിയിരിക്കുകയാണ്. മെയ് മാസ പുലരികള്‍ വല്ലാത്തൊരു നോവാണ്, ഞാനും അവളും ജനിച്ചത്, മാലാഖമാരുടെ ദിനം; ഒടുവില്‍ അവളു ഞങ്ങളെ വിട്ടു പോയതും മെയ് മാസത്തിലെന്ന് സജീഷ് കുറിക്കുന്നു. ലിനിയോടെ ഓര്‍മ്മനാളില്‍ മുന്‍ ആരോഗ്യമന്ത്രി കെകെ ശൈലജ ടീച്ചറും നിയുക്ത ആരോഗ്യമന്ത്രി വീണ ജോര്‍ജും, മുഖ്യമന്ത്രി പിണറായി വിജയനും ഓര്‍മ്മപ്പൂക്കള്‍ സമര്‍പ്പിച്ചിരുന്നു.
ഫേസ്ബുക്ക് പോസ്റ്റിന്റെ പൂര്‍ണ്ണ രൂപം;
മൂന്ന് വർഷങ്ങൾക്കു ശേഷം വീണ്ടും
മെയ് 21.
കൊഞ്ചിച്ചും ലാളിച്ചും മതിവരാതെ ഞങ്ങളുടെ കുഞ്ഞു മക്കളെ വിട്ട് അകാലത്തിൽ പൊലിഞ്ഞുപോയ പ്രിയപ്പെട്ടവൾ…
എത്ര വേഗമാണ് ശൂന്യത നിറഞ്ഞത്…
കരഞ്ഞു തീർത്ത രാത്രികൾ..
ഉറക്കമകന്ന ദിവസങ്ങൾ…
സിദ്ധു മോൻ അമ്മയെ തിരഞ്ഞ്‌ നടന്നപ്പോൾ നിസ്സഹായതയോടെ നോക്കി നിന്ന നിമിഷങ്ങൾ….
അമ്മ ഇനി വരില്ല എന്നും അമ്മ ആകാശത്തിലേക്ക്‌ പോയെന്നും പറഞ്ഞ്‌ സിദ്ധുവിനെ ആശ്വസിപ്പിക്കുന്ന കുഞ്ഞുവിന്റെ പക്വതയും….
നിപ്പ എന്ന മഹാമാരിയുടെ ഒറ്റപ്പെടുത്തൽ…
ഒരു നാട്‌ മുഴുവൻ ഒറ്റക്കെട്ടായ്‌ ചെറുത്ത്‌ നിന്നത്‌. ..
“ലിനിയുടെ മക്കൾ കേരളത്തിന്റെ മക്കളാണ്‌.” എന്ന മുഖ്യമന്ത്രിയുടെ വാക്ക്‌..
രാഷ്ട്രീയത്തിനും മതത്തിനും അതീതമായി എല്ലാ വിഭാഗം ജനങ്ങളും ഞങ്ങളെ മാറോട്‌ ചേർത്ത നിമിഷങ്ങൾ…
ലിനി ബാക്കി വെച്ച് പോയ അനശ്വരമായ ഓർമ്മകളെ ലോകം മുഴുവൻ നെഞ്ചിൽ ഏറ്റിയത്…
അവളിലൂടെ മഹനീയ മാക്കപ്പെട്ട നഴ്സ് എന്ന പദം….
നിപ കണ്ട് പകച്ചു പോയ ആദ്യ നിമിഷവും മറ്റൊരു മഹാമാരി വന്നപ്പോൾ പൊരുതി നിക്കാൻ നേടിയ ആത്മ വിശ്വാസവും ഇന്ന് അവളുടെ ഓർമകൾക്ക് ശക്തി പകരുന്നു..
ലിനി…
ഇന്ന് നിന്റെ പിൻഗാമികൾ ഹൃദയത്തിൽ തൊട്ട് പറയുന്നു “ലിനി നീ ഞങ്ങൾക്ക്‌ ധൈര്യമാണ്‌, അഭിമാനമാണ്‌, പ്രചോദനമാണ്‌”
എനിക്ക്‌ ഉറപ്പാണ്‌ ലിനി..
‘മാലാഖമാർ’ എന്ന പേരിന് അതിജീവനം എന്നർത്ഥം നല്കിയതിൽ നിന്റെ പങ്ക്‌ വളരെ വലുതാണ്‌.
അവരെ ചേർത്ത് പിടിക്കണം എന്ന് ലോകത്തെ ഓർമ്മിപ്പിക്കുന്നതിൽ നിന്റെ സേവനം വലിയൊരു പാഠമാണ്‌.
മെയ് മാസ പുലരികൾ വല്ലാത്തൊരു നോവാണ്..
അന്നൊരു മെയ് മാസത്തിൽ ആണ് ഞാനും അവളും ജനിച്ചത്…
മെയ്മാസത്തിൽ തന്നെ യാണ് മാലാഖമാരുടെ ദിനവും….
അന്നൊരു മെയ് മാസത്തിൽ ആണ് അവളു ഞങ്ങളെ വിട്ടു പോയതും….
അവളില്ലാത്ത ശൂന്യതയിൽ നിന്ന് ഇടയ്ക്കൊക്കെ മനസ്സ് തിരയുന്ന ഏട്ടാ..
എന്നൊരു വിളി….
എന്നിരുന്നാലും ലിനി…
നീ ഞങ്ങൾക്ക്‌ അഭിമാനം ആണ്
നിന്റെ ഓർമകൾക്ക് മരണമില്ല…
നിന്റെ പോരാട്ടത്തിന് മറവിയില്ല..
ലിനി…
നീ കൂടെ ഇല്ല എന്നയാഥാർത്ഥ്യത്തിന്റെ ഇടയിലും നിന്നെ ഓർത്ത് അഭിമാനിക്കാൻ ഇതിൽ കൂടുതൽ എന്തു വേണം……
Miss you Lini…. 
Discussion about this post