തിരുവനന്തപുരം: നിയമസഭാ തെരഞ്ഞെടുപ്പില് കേന്ദ്ര നേതാക്കളെയും കോടികള് ഒഴുക്കിയും പ്രചരണം നടത്തിയിട്ടും കേരളത്തില് ബിജെപി നേരിട്ടത് വന് പരാജയം. ഉണ്ടായിരുന്ന ഏക നേമം സീറ്റ് നഷ്ടപ്പെടുക മാത്രമാണ് ഉണ്ടായത്.
അതേസമയം, കേരളത്തിലെ 318 ബൂത്തുകളില് ബിജെപിയ്ക്ക് ഒരു വോട്ടും ലഭിച്ചിട്ടില്ലെന്ന് റിപ്പോര്ട്ട്. ഇതില് ബിജെപി സംസ്ഥാന അധ്യക്ഷന് കെ സുരേന്ദ്രന് മത്സരിച്ച മഞ്ചേശ്വരത്തേയും കോന്നിയിലേയും രണ്ട് ബൂത്തുകളും ഉള്പ്പെടും.
59 നിയോജക മണ്ഡലങ്ങളിലെ 318 ബൂത്തുകളിലാണ് ബിജെപിയ്ക്ക് ഒറ്റവോട്ടും നേടാനാകാത്തത്. 70 മണ്ഡലങ്ങളിലായി 493 ബൂത്തുകളില് ബിജെപി സ്ഥാനാര്ഥികള്ക്ക് കിട്ടിയത് വെറും ഓരോ വോട്ട് മാത്രം.
ആയിരത്തിലധികം ബൂത്തുകളില് മുന്നണി സ്ഥാനാര്ഥികള്ക്ക് കിട്ടിയത് രണ്ടു മുതല് അഞ്ച് വരെ വോട്ട് മാത്രമാണെന്നും തിരഞ്ഞെടുപ്പു കമ്മിഷന് പുറത്തുവിട്ട കണക്ക് വ്യക്തമാക്കുന്നു.
എംടി രമേശ് മത്സരിച്ച കോഴിക്കോട് നോര്ത്തിലെ ഒരു ബൂത്തില് ആരും അദ്ദേഹത്തിന് വോട്ടു ചെയ്തില്ല. സിനിമാ താരം കൃഷ്ണകുമാര് മത്സരിച്ച തിരുവനന്തപുരത്തെ എട്ട് ബൂത്തുകളില് അദ്ദേഹത്തിന് ഒരു വോട്ട് പോലുമില്ല.
മൊത്തം മുപ്പത്തയ്യായിരത്തോളം വോട്ട് നേടിയപ്പോഴും അഞ്ചിടത്ത് ഓരോ വോട്ടും മറ്റ് 19 ബൂത്തില് അഞ്ചില് താഴെ വോട്ടും മാത്രമാണ് കൃഷ്ണകുമാറിന് നേടാനായത്.
അതേസമയം ബിജെപി പ്രവര്ത്തകരുടെ വോട്ട് തനിക്ക് ലഭിച്ചില്ലെന്ന പരാതിയുമായി കൃഷ്ണകുമാര് രംഗത്തെത്തിയിരുന്നു. പ്രചാരണം കുറഞ്ഞുപോയെന്നും താരം ആരോപിച്ചിരുന്നു.
ഏറ്റവുമധികം വോട്ടില്ലാ ബൂത്തുകളും ഒറ്റ വോട്ട് ബൂത്തുകളും മലപ്പുറം ജില്ലയിലാണ്. അവിടെ നിലമ്പൂര് ഒഴികെ 15 മണ്ഡലത്തിലും ഇത്തരം ബൂത്തുകളുണ്ട്.
മലപ്പുറം ജില്ലയിലെ പൊന്നാനിയിലാണ് എന്ഡിഎക്ക് ഏറ്റവുമധികം വോട്ടില്ലാത്ത ബൂത്ത്. ഇവിടെ 34 ബൂത്തില് വോട്ടില്ലാതായപ്പോള് 16 ബൂത്തില് ഓരോ വോട്ട് മാത്രമാണ് കിട്ടിയത്.
കൊണ്ടോട്ടി (7 ബൂത്തില് 0 വോട്ട്,10 ല് ഒരു വോട്ട്), വണ്ടൂര് (15, 13), മഞ്ചേരി (4,6), പെരിന്തല്മണ്ണ (6,10), മങ്കട (9,15), മലപ്പുറം (12,16), വേങ്ങര (4,7), തിരൂരങ്ങാടി(16, 20), തിരൂര് (19,17), കോട്ടയക്കല് (4,10), തവനൂര് (3,11) മണ്ണാര്ക്കാട് (12,9) എന്നിങ്ങനെയാണ് വോട്ട് നില.
തൃശൂര് ജില്ലയില് കയ്പമംഗലത്തെ വോട്ടില്ലാത്ത രണ്ട് ബൂത്ത് കഴിഞ്ഞാല് ചേലക്കരയിലും കൊടുങ്ങല്ലൂരിലും ഓരോ ബൂത്തില് മാത്രമാണ് ഓരോ വോട്ട് മാത്രമായത്. മറ്റിടത്തെല്ലാം ഒന്നിലേറെ വോട്ടുണ്ട്.
നേരത്തെ ബി.ജെ.പി തിരുവനന്തപുരം ജില്ലാ നേതൃയോഗത്തില് നേതാക്കള് തമ്മിലുണ്ടായ തര്ക്കം വാര്ത്തയായിരുന്നു. ജില്ലാ പ്രസിഡന്റ് വി.വി രാജേഷ്, എസ്. സുരേഷ്, ജെ. ആര് പത്മകുമാര് എന്നിവര് തമ്മിലായിരുന്നു വാക്പോര്. മണ്ഡലം പ്രസിഡന്റുമാര് അവതരിപ്പിച്ച റിപ്പോര്ട്ടില് എല്ലായിടത്തും എന്.എസ്.എസ് വോട്ടുകള് ചോര്ന്നുവെന്നും വിലയിരുത്തലുണ്ട്.
നെടുമങ്ങാട്ടെ തോല്വിയിലെ റിപ്പോര്ട്ട് അവതരണത്തില് എന്.ഡി.എ സ്ഥാനാര്ത്ഥി ജെ. ആര് പത്മകുമാറിനെ മണ്ഡലം പ്രസിഡന്റ് വിമര്ശിക്കുകയും ചെയ്തു. എന്നാല് തനിക്ക് ജില്ലാ നേതൃത്വത്തില് നിന്നും വേണ്ട സഹായം ലഭിച്ചില്ലെന്നാണ് പത്മകുമാര് മറുപടി പറഞ്ഞത്.
Discussion about this post