കൊച്ചി: മന്ത്രി കെടി ജലീലിന്റെ രാജി ആവശ്യപ്പെട്ടുകൊണ്ട് ബിജെപി നടത്തിയ പ്രതിഷേധ മാര്ച്ചിനെ ചെങ്കൊടി നിവര്ത്തി നിന്ന് നേരിട്ട സഖാവിന്റെ ഫോട്ടോ സമൂഹമാധ്യമങ്ങളില് ഒന്നടങ്കം വൈറലായിരുന്നു. ‘ഒറ്റക്കൊരു പാര്ട്ടി’യെന്ന് വിശേഷിപ്പിച്ചുകൊണ്ടായിരുന്നു അദ്ദേഹത്തിന്റെ ചിത്രം സമൂഹമാധ്യമങ്ങള് ഏറ്റെടുത്തത്.
ഇടപ്പള്ളി സ്വദേശിയും സിപിഐഎം പ്രവര്ത്തകനുമായ രതീഷ് ആണ് ഒരാഴ്ചയായി ആഘോഷിക്കപ്പെട്ട ഈ വൈറല് സഖാവ്. എം സ്വരാജ് എംഎല്എ മറ്റൊരവസരത്തില് പറഞ്ഞ വാക്കുകള് ചേര്ത്താണ് ചെങ്കൊടി നിവര്ത്തി തലയുയര്ത്തിപ്പിടിച്ച് നിന്ന രതീഷിന്റെ വീഡിയോ വ്യാപകമായി ഷെയര് ചെയ്യപ്പെട്ടത്.
‘ഞങ്ങളിലൊന്നേ അവശേഷിക്കുന്നുള്ളുവെങ്കില് പോലും അയാളൊരു പാര്ട്ടിയായി മാറു’മെന്നായിരുന്നു സ്വരാജിന്റെ വാചകം.ചിത്രം വൈറലായതോടെ ആളാരെന്ന് തിരക്കുകയായിരുന്നു സോഷ്യല് മീഡിയയും ചാനലുകളും മാധ്യമപ്രവര്ത്തകരുമെല്ലാം.
ട്വന്റി ഫോര് ചാനലാണ് അന്നത്തെ ചെങ്കൊടി നിവര്ത്തി പ്രതിഷേധിച്ചയാള് രതീഷാണെന്ന് വെളിപ്പെടുത്തിയത്. ചിത്രം വൈറലായി ഒരാഴ്ചക്ക് ശേഷമാണ് ചാനല് ഈ വാര്ത്താ താരത്തെ കണ്ടെത്തിയത്.ട്വന്റി ഫോര് റിപ്പോര്ട്ടര് സഹിന് ആന്റണിയാണ് രതീഷിനെ ചാനല് ക്യാമറക്ക് മുന്നിലെത്തിച്ചത്.
എന്നാല് മൊബൈല് ഫോണ് ഉപയോഗിക്കാത്തതിനാല് സാമൂഹിക മാധ്യമങ്ങളിലെ ആഘോഷമൊന്നും രതീഷ് അറിഞ്ഞതുമില്ല. എസ് എഫ് ഐ ജില്ലാ കമ്മിറ്റിയില് ഉണ്ടായിരുന്ന സനല് എന്ന ഫ്രണ്ട് പറഞ്ഞാണ് സംഗതി വൈറലായ കാര്യം പറഞ്ഞത്. പ്രതിഷേധം നടത്തിയ കാര്യം സനലിനോട് പറഞ്ഞപ്പോഴാണ് ആളെ പുറം ലോകമറിഞ്ഞത്., രതീഷ് പറയുന്നു.
Discussion about this post