നടി ആക്രമിക്കപ്പെട്ട കേസില് സാക്ഷികളുടെ കൂറുമാറ്റത്തെ വിമര്ശിച്ച് രേവതിയും റിമ കല്ലിങ്കലും.’സിനിമയിലെ സ്വന്തം സഹപ്രവര്ത്തകരെ വിശ്വസിക്കാന് കഴിയാത്തതില് വിഷമമുണ്ട് എന്ന് രേവതി പ്രതികരിച്ചു. ഇടവേള ബാബു, ബിന്ദു പണിക്കരും സിദ്ധിക്കും കൂറുമാറിയത് മനസ്സിലാക്കാം, എന്നാല് ഭാമ കൂറുമാറിയത് മനസ്സിലാക്കാന് കഴിയുന്നില്ലെന്ന് രേവതി കുറിച്ചു. ‘ഏറ്റവും കൂടുതല് സഹായം ആവശ്യമുള്ള അവസാന സമയത്ത് ചില സഹപ്രവര്ത്തകര് അവള്ക്കെതിരെ തിരിഞ്ഞത് കടുത്ത ദുഃഖമുണ്ടാക്കുന്നതാണ്. കേട്ടത് സത്യമാണെങ്കില് എന്തൊരു നാണക്കേടാണിതെന്ന് റിമയും കുറിച്ചു.
ഫേസ്ബുക്കിലൂടെയായിരുന്നു നടിമാര് വിമര്ശനം ഉന്നയിച്ചത്. ‘ഏറ്റവും കൂടുതല് സഹായം ആവശ്യമുള്ള അവസാന സമയത്ത് ചില സഹപ്രവര്ത്തകര് അവള്ക്കെതിരെ തിരിഞ്ഞത് കടുത്ത ദുഃഖമുണ്ടാക്കുന്നതാണ്. നാല് പേര് അവരുടെ മൊഴി മാറ്റിപ്പറഞ്ഞെന്നാണ് കേള്ക്കുന്നത്. നമുക്കറിയാവുന്നത് പോലെ, ഇപ്പോള് കൂറുമാറിയ സ്ത്രീകളും സിനിമാ വ്യവസായത്തിന്റെ അധികാര ശ്രേണിയില് യാതൊരു സ്ഥാനവുമില്ലാത്ത ഇരകളാണ്. എന്നിട്ടുപോലും അതെന്നെ വല്ലാതെ വേദനിപ്പിക്കുന്നു. ഇതുവരെ ഇടവേള ബാബു, ബിന്ദു പണിക്കര്, സിദ്ദിഖ്, ഭാമ എന്നിവരാണ് കൂറുമാറിയവര്. കേട്ടത് സത്യമാണെങ്കില് എന്തൊരു നാണക്കേടാണിത്‘-റിമ കുറിച്ചു.
സിനിമ രംഗത്തുള്ള സഹപ്രവര്ത്തകരെപ്പോലും വിശ്വാസിക്കാനാകില്ല എന്നത് അത്യന്തം സങ്കടകരമാണ്. ഇത്രയേറെ സിനിമകളില് വര്ഷങ്ങളായി കൂടെ പ്രവര്ത്തിച്ചും ഒത്തിരി നല്ല സമയങ്ങള് പങ്കുവെച്ചിട്ടും, കൂടെയുള്ള ഒരു ‘സ്ത്രീ’യുടെ വിഷയം വന്നപ്പോള് അതെല്ലാം മറന്നു പോയിരിക്കുകയാണ് ചിലര്. ഏറെ പ്രശസ്തമായതും, എന്നാല് ഇന്ന് ചര്ച്ചാവിഷയം അല്ലാതായി മാറിയ 2017ലെ നടിയെ ആക്രമിച്ച കേസില് ഇടവേള ബാബുവും ബിന്ദു പണിക്കരും കോടതിയില് മൊഴി മാറ്റിപറഞ്ഞതില് ഏറെ അത്ഭുതമില്ല. സിദ്ദിഖിന്റെ മൊഴി മാറ്റിപറയലും അതുപോലെ തന്നെ. എന്നാല് ആ നടിയുടെ വിശ്വസ്തയായിരുന്ന ഭാമയും പോലീസിന് നല്കിയ മൊഴി മാറ്റിപറഞ്ഞത് ഏറെ ആശ്ചര്യപ്പെടുത്തുന്നു. ഇതുപോലുള്ള കഷ്ടപ്പാടുകള്ക്കിടയിലും അതിജീവിത ഇത്ര നാളായി നീതിക്കായി പൊരുതുകയാണ്. അവര്ക്കു സംഭവിച്ചതിനെതിരെ ഒരു പരാതി നല്കി എന്ന പേരില് അവരുടെ ജീവിതത്തിലും കുടുംബത്തിലും ഉണ്ടാകുന്ന ദുരിതങ്ങള് ആരും മനസിലാക്കുന്നില്ല.-രേവതി കുറിച്ചു.
നടിയെ ആക്രമിച്ച കേസില് വിചാരണ തുടരുകയാണ്. ദിലീപിനെതിരെയുള്ള മൊഴിയാണ് ഭാമ, സിദ്ദീഖ്, ഇടവേള ബാബു, ബിന്ദു പണിക്കര് എന്നിവര് മാറ്റിപ്പറഞ്ഞത്. അതേസമയം ജാമ്യവ്യവസ്ഥകള് ലംഘിച്ചെന്നാരോപിച്ച് ദിലീപിന്റെ ജാമ്യം റദ്ദാക്കാന് അന്വേഷണസംഘം സമര്പ്പിച്ച ഹര്ജി വിചാരണക്കോടതിയുടെ പരിഗണനയിലാണ്.
Discussion about this post