തിരുവനന്തപുരം: സംസ്ഥാനത്ത് ഇന്ന് കൊവിഡ് ബാധിച്ച് മരിച്ചവരുടെ എണ്ണം എട്ട് ആയി. കൊല്ലത്ത് മൂന്ന് പേരും കോഴിക്കോട് രണ്ട് പേരും മലപ്പുറം, കാസര്കോട്, കണ്ണൂര് ജില്ലകളില് ഒരോരുത്തര് വീതവുമാണ് മരിച്ചത്. കൊല്ലത്ത് മരിച്ച മൂന്നുപേരും പാരിപ്പള്ളി മെഡിക്കല് കോളജില് ചികിത്സയില് ആയിരുന്നു. അഞ്ചല് സ്വദേശിനി അശ്വതി രാവിലെ എട്ടു മണിയോടെയാണ് മരിച്ചത്. കരള് സംബന്ധമായ അസുഖങ്ങളുണ്ടായിരുന്നു.
കഴിഞ്ഞ വെള്ളിയാഴ്ചയാണ് കൊവിഡ് ബാധിച്ചതിനെ തുടര്ന്ന് പാരിപ്പള്ളി മെഡിക്കല് കോളജില് പ്രവേശിപ്പിച്ചത്. തിരുവനന്തപുരം മെഡിക്കല് കോളജില് ചികിത്സക്കു പോയപ്പോള് സമ്പര്ക്കത്തില് കൂടി അശ്വതിക്ക് കൊവിഡ് ബാധിച്ചതെന്നാണ് ആരോഗ്യ വകുപ്പിന്റെ നിഗമനം.അശ്വതിയുടെ അമ്മ ജില്ലാ ആശുപത്രിയില് കൊവിഡ് ചികിത്സയില് ആണ്.
കൊല്ലം ദേവിനഗര് സ്വദേശി ആന്റണിയാണ് മരിച്ച രണ്ടാമത്തെ ആള്. എഴുപതുവയസായിരുന്നു. ചെറിയ വെളിനല്ലൂര് സ്വദേശി ആശാ മുജീബും മരിച്ചു. മാവൂര് കുതിരാടം സ്വദേശി കമ്മുക്കുട്ടി, കൊയിലാണ്ടി സ്വദേശി സൗദ എന്നിവരാണ് കോഴിക്കോട് മരിച്ചത്. ഇരുവരും വൃക്ക രോഗികളായിരുന്നു. കോഴിക്കോട് മെഡിക്കല് കോളേജ് ആശുപത്രിയില് ചികിത്സയിലിരിക്കെയായിരുന്നു ഇരുവരുടെയും മരണം.
കണ്ണൂരില് തളിപ്പറമ്പ് സ്വദേശി സത്താര് കൊവിഡ് ബാധിച്ച മരിച്ചു. പരിയാരം മെഡിക്കല് കോളേജ് ആശുപത്രിയില്വെച്ചാണ് മരിച്ചത്. ക്യാന്സര് ബാധിതനായിരുന്നു. മലപ്പുറത്ത് ഒളവട്ടൂര് സ്വദേശി ആമിന മഞ്ചേരി മെഡിക്കല് കോളജിലും മരിച്ചു. മഞ്ചേശ്വരം ഹൊസങ്കടി അബ്ദുല് റഹ്മാന് ആണ് കാസര്കോട്ട് മരിച്ചത്. പരിയാരം മെഡിക്കല് കോളേജില് ചികിത്സയിലിരിക്കെയാണ് മരണം. ഹൃദ്രോഗവും, പ്രമേഹവും ഉള്പ്പെടെയുള്ള അസുഖങ്ങളും ഉണ്ടായിരുന്നു.
Discussion about this post