ആലപ്പുഴ; ഡ്രിപ്പ് ഇടാന് കുത്തിയ സൂചിയിലൂടെ രക്തം തിരികെ കയറി യുവാവിന് ദാരുണ മരണം. മെഡിക്കല് കോളേജ് ആശുപത്രിയില് ചികിത്സയില് കഴിഞ്ഞിരുന്ന മാനസിക വെല്ലുവിളി നേരിടുന്ന യുവാവാണ് അധികൃതരുടെ അനാസ്ഥയില് ജീവന് വെടിഞ്ഞത്.
പൂച്ചക്കല് വടുതല സഫ്വാന് മന്സിലില് സഫ്വാന് (32) ആണ് മരിച്ചത്. ശരീര വേദനയും തലചുറ്റലും മൂലം സഫ്വാനെ കഴിഞ്ഞ രണ്ടിനാണ് ആശുപത്രിയില് പ്രവേശിപ്പിച്ചത്. ചികിത്സയില് കഴിയുകയായിരുന്ന യുവാവിനെ 11 ന് വൈകിട്ടോടെ ഡ്രിപ്പ് ഇട്ടു. എന്നാല് വലതു കൈയില് കുത്തിയിരുന്ന സൂചിയില് നിന്ന് രക്തം തിരികെ ഒഴുകുകയായിരുന്നു.
ഉടുവസ്ത്രത്തിലും കിടക്കയിലും ഷീറ്റിലും രക്തം നിറഞ്ഞപ്പോള് മാത്രമാണ് ജീവനക്കാര് സംഭവം അറിഞ്ഞത്. ജീവനക്കാര് സൂചി മാറ്റിയതോടെ രക്തം നിലച്ചു. അമിതമായി രക്തം വാര്ന്നൊഴുകിയതിനെ തുടര്ന്ന് സഫ്വാന്റെ നില ഗുരുതരമായി. തുടര്ന്ന് ചികിത്സയിലായിരുന്ന യുവാവ് ഇന്നലെ വൈകിട്ടോടെ മരിക്കുകയായിരുന്നു.
Discussion about this post