ന്യൂഡല്ഹി: രാജസ്ഥാനില് നിന്നുള്ള ബിജെപി എംപി ഓം ബിര്ള ലോകസഭ സ്പീക്കറാകുമെന്ന് സൂചന. ഇത് സംബന്ധിച്ച ഔദ്യോഗിക പ്രഖ്യാപനം ഇന്ന് ഉച്ചക്ക് മുമ്പുണ്ടായേക്കുമെന്നാണ് റിപ്പോര്ട്ട്. കോട്ട ലോകസഭ മണ്ഡലത്തില് നിന്ന് തെരഞ്ഞെടുക്കപ്പെട്ട ഓം ബിര്ള ഇത് രണ്ടാം തവണയാണ് ലോകസഭയില് എത്തുന്നത്. നേരത്തെ രാജസ്ഥാന് മന്ത്രിസഭയില് അംഗമായിരുന്നു ഓം ബിര്ള.
വിദ്യാര്ത്ഥി രാഷ്ട്രീയത്തിലൂടെ കടന്നുവന്ന ഓം ബിര്ള യുവമോര്ച്ചയുടെ ദേശീയ വൈസ് പ്രസിഡന്റ് പദവി വരെ അലങ്കരിച്ചു. മേനക ഗാന്ധിയുള്പ്പെടെയുള്ളവരുടെ പേരുകള് നേരത്തെ സ്പീക്കര് സ്ഥാനത്തേക്ക് പരിഗണിക്കുന്നതായി റിപ്പോര്ട്ടുകളുണ്ടായിരുന്നു. അതിനിടെയാണ് ഓം ബിര്ളയുടെ പേര് പുറത്ത് വരുന്നത്. സ്പീക്കര് സ്ഥാനത്തേക്ക് നാമനിര്ദ്ദേശ പത്രിക സമര്പ്പിക്കാനുള്ള അവസാന തീയതി ഇന്നാണ്. നാളെയാണ് സ്പീക്കര് തെരഞ്ഞെടുപ്പ്.
പുതിയ അംഗങ്ങളുടെ സത്യപ്രതിജ്ഞ ഇന്നും ലോക്സഭയില് തുടരും. ഒഡീഷയില് നിന്നുള്ള എംപിമാരാണ് ഇന്നലെ അവസാനമായി സത്യപ്രതിജ്ഞ ചെയ്തത്. പഞ്ചാബ്, രാജസ്ഥാന്, പഞ്ചാബ്, ഉത്തര്പ്രദേശ്, തമിഴ്നാട്, തെലങ്കാന, പശ്ചിമ ബംഗാള് തുടങ്ങിയ സംസ്ഥാനങ്ങളിലെ എംപിമാരാകും ഇന്ന് സത്യപ്രതിജ്ഞ ചെയ്യുക.
കേരളത്തില് നിന്ന് തിരുവനന്തപുരം എംപി ശശി തരൂര് ഇന്ന് സത്യപ്രതിജ്ഞ ചെയ്യും. ലണ്ടനില് ഇന്ത്യാ പാക് ക്രിക്കറ്റ് മത്സരം കാണാന് പോയ തരൂര് ഇന്നലെ തിരിച്ചെത്തിയിരുന്നില്ല. ഉത്തര്പ്രദേശിലെ എംപി എന്ന നിലയില് സോണിയ ഗാന്ധിയും ഇന്നായിരിക്കും സത്യപ്രതിജ്ഞ ചെയ്യുക.
Discussion about this post