ന്യൂഡല്ഹി: കളിക്കളത്തിലുണ്ടാക്കിയ നേട്ടം രാഷ്ട്രീയത്തിലും ആവര്ത്തിച്ച് ബിജെപി ടിക്കറ്റില് മത്സരിക്കാനിറങ്ങിയ സ്ഥാനാര്ത്ഥികള്. എന്നാല് കോണ്ഗ്രസ് ടിക്കറ്റില് ജനിവിധി തേടിയ താരങ്ങള്ക്കെല്ലാം ഉന്നം പിഴയ്ക്കുകയും ചെയ്തു. കേന്ദ്രമന്ത്രി രാജ്യവര്ധന് സിങ് റാത്തോഡിനൊപ്പം ബിജെപിയില് ചേര്ന്ന് കന്നിയങ്കത്തിനിറങ്ങിയ ക്രിക്കറ്റര് ഗൗതം ഗംഭീറും അനായാസം ജയം സ്വന്തമാക്കി. എന്നാല്, കോണ്ഗ്രസ് സ്ഥാനാര്ത്ഥിയായി മത്സരിച്ച ബോക്സര് വിജേന്ദര് സിങ്ങും മുന് ക്രിക്കറ്റര് കീര്ത്തി ആസാദും ഡിസ്കസ് ത്രോ താരം കൃഷ്ണ പൂനിയയും തോറ്റു.
സ്ഥാനാര്ത്ഥി പ്രഖ്യാപനം പുരോഗമിക്കവെ ബിജെപിയില് ചേര്ന്ന് ഈസ്റ്റ് ഡല്ഹിയില് നിന്നാണ് മുന്ക്രിക്കറ്റര് ഗൗതം ഗംഭീര് ജനവിധി തേടിയത്. ഗംഭീര് ഏഴു ലക്ഷത്തോളം വോട്ട് നേടിയപ്പോള് കോണ്ഗ്രസിന്റെ അര്വീന്ദര് സിങ് ലൗലി 3.1 ലക്ഷത്തോളം വോട്ടുമായി രണ്ടാം സ്ഥാനത്തായി. ആം ആദ്മി പാര്ട്ടിയുടെ അതിഷി 17.5 ശതമാനം വോട്ടുമായി മൂന്നാംസ്ഥാനത്തേക്ക് പോയി.
അതേസമയം, ഏറ്റവും ഒടുവിലായി അപ്രതീക്ഷിത നീക്കത്തിലൂടെ സൗത്ത് ഡല്ഹിയില് കോണ്ഗ്രസ് സ്ഥാനാര്ത്ഥിയായ ബോക്സര് വിജേന്ദര് സിങ് മൂന്നാം സ്ഥാനത്തേക്ക് പിന്തള്ളപ്പെട്ടു. ഇവിടെ ഏഴു ലക്ഷത്തോളം വോട്ടുനേടി ബിജെപി യുടെ രമേഷ് ബിദൂരി ജയിച്ചപ്പോള് ആം ആദ്മി പാര്ട്ടിയുടെ രാഘവ് ചന്ദ മൂന്നുലക്ഷത്തിലേറെ വോട്ടുനേടി. രണ്ടു ലക്ഷത്തോളം വോട്ടു നേടാനേ വിജേന്ദറിനായുള്ളൂ. 2008 ബെയ്ജിങ് ഒളിമ്പിക്സിലെ വെങ്കലമെഡല് ജേതാവും ഇപ്പോള് പ്രൊഫഷണല് ബോക്സറുമാണ് വിജേന്ദര്.
ബിജെപിയുടെ കേന്ദ്രമന്ത്രിയായിരുന്ന ഒളിംപ്യന് രാജ്യവര്ധന് സിങ് റാത്തോഡ് വിജയം ആവര്ത്തിച്ചു. രാജസ്ഥാനിലെ ജയ്പുര് റൂറലില് എട്ടുലക്ഷത്തിലേറെ വോട്ടുനേടി റാത്തോഡ് വന് വിജയം സ്വന്തമാക്കി. പ്രധാന എതിരാളിയായ കോണ്ഗ്രസിന്റെ കൃഷ്ണ പൂനിയക്ക് നാലര ലക്ഷത്തോളം വോട്ടുകളേയുള്ളൂ. റാത്തോഡ് 65 ശതമാനത്തോളം വോട്ടുനേടി.
റാത്തോഡും കൃഷ്ണ പൂനിയയും ഒളിംപിക്സില് ഇന്ത്യയ്ക്കുവേണ്ടി മത്സരിച്ചിട്ടുണ്ട്. റാത്തോഡ് 2004 ഏഥന്സ് ഒളിമ്പിക്സില് വെള്ളി നേടിയിരുന്നു. ഇന്ത്യയുടെ മുന് ക്രിക്കറ്റ് താരം കീര്ത്തി ആസാദിന് ജാര്ഖണ്ഡിലെ ധന്ബാദില് നാലരലക്ഷത്തോളം വോട്ടിന്റെ വ്യത്യാസത്തിലാണ് തോറ്റത്. കോണ്ഗ്രസ് ടിക്കറ്റില് മത്സരിച്ച കീര്ത്തി ആസാദിനെ ബിജെപി സ്ഥാനാര്ഥി പശുപതി നാഥ് സിങാണ് തോല്പ്പിച്ചത്.
Discussion about this post