ഷില്ലോങ്: പൗരത്വ ബില്ലിനെതിരെ എതിര്പ്പുമായി മേഘാലയിലെ ബിജെപി സ്ഥാനാര്ത്ഥി രംഗത്ത്. പൗരത്വ ഭേദഗതി ബില് നടപ്പിലാക്കുകയാണെങ്കില് പിന്നെ ജീവിച്ചിരിക്കില്ലെന്ന ഭീഷണിയുമായാണ് മേഘാലയിലെ ബിജെപി സ്ഥാനാര്ത്ഥി രംഗത്ത് എത്തിയത്.
ഷില്ലോങിലെ ബിജെപി സ്ഥാനാര്ത്ഥിയായ സന്ബോര് ഷുള്ളൈയാണ് ഭീഷണിയുമായി വന്നിരിക്കുന്നത്. ഞാന് ജീവിച്ചിരിക്കുന്നിടത്തോളം കാലം വടക്ക് കിഴക്കന് സംസ്ഥാനങ്ങളില് പൗരത്വ ഭേദഗതി ബില് നടപ്പില് വരുത്താന് സമ്മതിക്കില്ലെന്ന് അദ്ദേഹം പറഞ്ഞു. അങ്ങനെ നടന്നാല് നരേന്ദ്ര മോഡിക്ക് മുന്നില് ജീവന് അവസാനിപ്പിക്കുമെന്നും അദ്ദേഹം കൂട്ടിച്ചേര്ത്തു.
ഇന്ത്യയുടെ മറ്റു ഭാഗങ്ങളില് ഇത് നടപ്പാക്കിയാല് പ്രശ്നമില്ല. മേഘാലയിലും വടക്ക് കിഴക്ക് സംസ്ഥാനങ്ങളിലും ഇതിന് താന് അനുവദിക്കില്ലെന്നാണ് അദ്ദേഹം പറയുന്നത്.
സംഭവത്തിന്റെ പശ്ചാത്തലത്തില് പ്രധാനമന്ത്രി നരേന്ദ്ര മോഡിക്കും മറ്റു നേതാക്കള്ക്കും അദ്ദേഹം കത്തയച്ചു.
പൗരത്വ ഭേദഗതി ബില് നടപ്പാക്കുകയാണെങ്കില് വടക്ക് കിഴക്കന് സംസ്ഥാനങ്ങളെ ഒഴിവാക്കി തരണമെന്നാണ് കത്തില് ആവശ്യപ്പെട്ടിരിക്കുന്നത്. അതേസമയം അധികാരത്തില് തുടരുകയാണെങ്കില് പൗരത്വഭേദഗതി ബില് നടപ്പിലാക്കുമെന്ന് ബിജെപി പ്രകടനപത്രികയിലും മോഡിയടക്കമുള്ള നേതാക്കളുടെ പ്രസംഗത്തിലും ആവര്ത്തിച്ച് പറയുന്നുണ്ട്.
Discussion about this post