ന്യൂഡല്ഹി: വൈറസ് ബാധിതരുടെ എണ്ണം വര്ധിച്ചുവരുന്ന സാഹചര്യത്തില് രാജ്യത്ത് വീണ്ടും ലോക്ക്ഡൗണ് ഏര്പ്പെടുത്തുമെന്നുളള അഭ്യൂഹങ്ങള്ക്ക് വിരാമമിട്ട് ആഭ്യന്തരമന്ത്രാലയം. കേന്ദ്രത്തിന്റെ അനുമതിയില്ലാതെ സംസ്ഥാനങ്ങളോ കേന്ദ്രഭരണപ്രദേശങ്ങളോ കണ്ടെയ്ന്മെന്റ് സോണുകള്ക്ക് പുറത്ത് ലോക്ഡൗണ് ഏര്പ്പെടുത്താന് പാടില്ലെന്നാണ് മന്ത്രാലയം പുറത്തിറക്കിയ പുതിയ മാര്ഗ നിര്ദേശത്തില് പറയുന്നത്.
അതേസമയം രാത്രി കര്ഫ്യൂ ഏര്പ്പെടുത്തുന്നതിന് അനുവാദം നല്കിയിട്ടുണ്ട്. സംസ്ഥാനങ്ങള്ക്കും കേന്ദ്രഭരണ പ്രദേശങ്ങള്ക്കും സ്ഥിതിഗതികള് വിലയിരുത്തിയതിന്റെ അടിസ്ഥാനത്തില് വൈറസ് വ്യാപനം നിയന്ത്രിക്കുന്നതിനായി രാത്രി കര്ഫ്യൂ പോലുളള പ്രാദേശികമായ നിയന്ത്രണങ്ങളേര്പ്പെടുത്താം. എന്നാല് ഇത്തരം നിയന്ത്രണങ്ങള് സംസ്ഥാനത്തിന് അകത്തോ പുറത്തോ ഉളള ആളുകളുടെയും ചരക്കുകളുടെയും നീക്കത്തെ തടസ്സപ്പെടുത്തുന്നതാകരുതെന്നും നിര്ദേശത്തിലുണ്ട്.
അടുത്തമാസം ഒന്നാം തീയതി മുതലാണ് പുതിയ മാര്ഗ നിര്ദേശങ്ങള് നിലവില് വരിക. ഡിസംബര് 31 വരെയായിരിക്കും പ്രാബല്യം. ഓണം, ദസ്സറ, ദീപാവലി തുടങ്ങിയ ആഘോഷങ്ങളെ തുടര്ന്ന് ഡല്ഹി, പഞ്ചാബ്, ഉത്തര്പ്രദേശ്, ഗുജറാത്ത്, ഹിമാചല് പ്രദേശ്, കേരളം എന്നാ സംസ്ഥാനങ്ങളില് വൈറസ് ബാധിതരുടെ എണ്ണം വര്ധിച്ചതിന്റെ പശ്ചാത്തലത്തിലും, ശൈത്യകാലം ആരംഭിച്ചതിന്റെ പശ്ചാത്തലത്തിലുമാണ് കേന്ദ്രം പുതിയ മാര്ഗനിര്ദേശങ്ങള് പുറപ്പെടുവിച്ചിരിക്കുന്നത്.
കൊവിഡ് വൈറസിനെ പൂര്ണമായി മറികടക്കാന് ജാഗ്രത പാലിക്കേണ്ടതുണ്ടെന്നും അതിനാല് ആഭ്യന്തരമന്ത്രാലയം പുറപ്പെടുവിച്ച മാര്ഗനിര്ദേശങ്ങള് പാലിക്കാന് ശ്രദ്ധിക്കണമെന്നും മന്ത്രാലയം വ്യക്തമാക്കി. ജില്ലാ, പോലീസ്, മുനിസിപ്പല് അധികൃതര് ഇത് കര്ശനമായി നടപ്പാക്കുന്നുണ്ടെന്ന് ഉറപ്പുവരുത്തണമെന്നും മാര്ഗനിര്ദേശങ്ങളില് പറയുന്നുണ്ട്.
കേന്ദ്ര ആരോഗ്യ കുടുംബക്ഷേമ മന്ത്രാലയത്തിന്റെ മാര്ഗനിര്ദേശങ്ങളുടെ അടിസ്ഥാനത്തില് മൈക്രോ തലത്തില് ജില്ലാ ഭരണകൂടം കണ്ടെയ്ന്മെന്റ് സോണുകള് വേര്തിരിക്കണം. കണ്ടെയ്ന്മെന്റ് സോണുകളുടെ പട്ടിക വെബ്സൈറ്റുകളില് അതാത് ജില്ലാ കളക്ടര്മാരും, സംസ്ഥാനങ്ങള്/ കേന്ദ്രഭരണപ്രദേശങ്ങള് അറിയിക്കും. കണ്ടെയ്ന്മെന്റ് സോണുകളില് അവശ്യപ്രവര്ത്തനങ്ങള്ക്ക് മാത്രം അനുമതി. ചികിത്സാ ആവശ്യത്തിനോ, അവശ്യ സാധനങ്ങളുടെയും സേവനങ്ങളുടെയും ലഭ്യത ഉറപ്പാക്കാനോ അല്ലാതെയുളള ആളുകള് യാത്ര ചെയ്യുന്നില്ലെന്ന് ഉറപ്പുവരുത്തണം. വീടുകള് തോറും നീരീക്ഷണം പ്രൊട്ടോക്കോള് പ്രകാരമുളള പരിശോധന സമ്പര്ക്ക പട്ടിക കൃത്യമായി വേഗത്തില് കണ്ടെത്തുക. കോവിഡ് 19 രോഗികളെ വേഗത്തില് ഐസൊലേഷനിലാക്കുകയും ചികിത്സ ഉറപ്പുവരുത്തുകയും ചെയ്യുക. തുടങ്ങിയവയാണ് പുതിയ മാര്ഗനിര്ദേശങ്ങളില് പറയുന്നത്.
Discussion about this post