ഷൂട്ടിങിനും മറ്റുമായി വിദേശത്തു പോയി തിരിച്ചെത്തിയ സിനിമാതാരങ്ങള് സ്വയം നിരീക്ഷണത്തില് കഴിയുകയും കൊറോണ വ്യാപനം തടയുന്നതുമായി ബന്ധപ്പെട്ടുള്ള നിര്ദേശങ്ങള് പാലിക്കുകയും ചെയ്യുന്നതിന്റെ വാര്ത്തകളും ചിത്രങ്ങളും സമൂഹമാധ്യമങ്ങളില് കാണാറുണ്ട്. അത്തരത്തില് ഇപ്പോള് മാധ്യമങ്ങളില് നിറയുന്നത് ഐസൊലേഷനില് കഴിയുന്ന മകനോട് ചില്ലുകൂട്ടിന് പുറത്ത് നിന്ന് സംസാരിക്കുന്ന നടി സുഹാസിനിയുടെ വീഡിയോയാണ്.
സംവിധായകന് മണിരത്നത്തിന്റെയും സുഹാസിനിയുടെയും മകന് നന്ദന് മാര്ച്ച് 18നാണ് ലണ്ടനില് നിന്നുമെത്തിയത്. രോഗലക്ഷണങ്ങള് ഇല്ലെങ്കിലും വിദേശത്തുനിന്നുമെത്തിയതിനാല് അധികൃതര് നല്കിയ നിര്ദേശം പാലിച്ച് സ്വയം ഐസൊലഷനില് കഴിയാന് തീരുമാനിക്കുകയായിരുന്നു നന്ദന്.
മുറിയില് നിന്നും പുറത്തിറങ്ങാതെ കഴിയുന്ന മകന്റെ വീഡിയോ മുറിക്ക് പുറത്തുനിന്നുകൊണ്ടാണ് സുഹാസിനി ഫോണില് പകര്ത്തിയത്. സര്ക്കാരിന്റെയും ആരോഗ്യ പ്രവര്ത്തകരുടെയും നിര്ദ്ദേശങ്ങള് തങ്ങള് പാലിക്കുകയാണെന്നും സുഹാസിനി പറഞ്ഞു.
മകന് രോഗലക്ഷണങ്ങള് ഇല്ലെങ്കിലും യൂറോപ്പില് പലയിടങ്ങളിലും യാത്ര ചെയ്തിട്ടുണ്ടെന്നും ഐസൊലേഷനില് അഞ്ച് ദിവസമായി. നാമെല്ലാവരും ആരോഗ്യത്തോടെയും സുരക്ഷിതരായും കഴിയാന് ഇത് അത്യാവശ്യമാണെന്നും സോഷ്യല് മീഡിയയില് പങ്കുവെച്ച വീഡിയയോയില് താരം വ്യക്തമാക്കുന്നു.
Discussion about this post