ദുബായി: പുക ശ്വസിച്ച് രണ്ട് മലയാളി യുവാക്കള്‍ ദുബായിയില്‍ മരിച്ചു. തിരുവനന്തപുരം കല്ലറക്കോണം സ്വദേശി ഉണ്ണി ഉദയന്‍ (22) വള്ളക്കടവ് ശ്രീചിത്തിര നഗര്‍ സ്വദേശി വിനീത് അയ്യപ്പന്‍ (31) എന്നിവരാണ് മരിച്ചത്. ഭക്ഷണം പാചകം ചെയ്യാനായി വിറക് കത്തിച്ചതിനെ തുടര്‍ന്ന് പടര്‍ന്ന പുക ശ്വസിച്ചാണ് ഇരുവരും മരിച്ചത്.
കഴിഞ്ഞ ദിവസമായിരുന്നു സംഭവം. സത്വയില്‍ യുവാക്കള്‍ താമസിച്ചിരുന്ന വില്ലയിലെ മുറിയില്‍ ബാര്‍ബിക്യു പാകം ചെയ്യാനായി ഇവര്‍ വിറക് കൂട്ടിയിട്ട്കത്തിച്ചിരുന്നു. എന്നാല്‍ തീ പൂര്‍ണമായും അണക്കാതെ ഇരുവരും മുറിയില്‍ കിടന്നുറങ്ങി. ഇതിന് പിന്നാലെയാണ് പുക പടര്‍ന്നതെന്നും യുവാക്കള്‍ പുക ശ്വസിച്ച് മരിക്കുകയായിരുന്നെന്നും സുഹൃത്തുക്കള്‍ പറഞ്ഞു.
കല്ലറക്കോണം പകല്‍കുറി ചാരുവിള പുത്തന്‍വീട്ടില്‍ ഉദയന്‍ തുളസി ദമ്പതികളുടെ മകനാണ് ഉണ്ണി. തിരുവനന്തപുരം വിമാനത്താവളത്തിന് സമീപം വള്ളക്കടവ് ശ്രീചിത്തിര നഗറില്‍ ടിസി 34/1134ല്‍ അയ്യപ്പന്‍നായരുടെയും പുഷ്പലത തങ്കമ്മയുടെയും മകനാണ് വിനീത്. ഭാര്യ: നിഷ ആന്റണി. മൃതദേഹങ്ങള്‍ നാട്ടിലെത്തിക്കാനുള്ള നടപടികള്‍ പുരോഗമിക്കുന്നു.
Discussion about this post