മലയാളത്തിന്റെ ലേഡി സൂപ്പര് സ്റ്റാര് മഞ്ജു വാര്യരിന് ഇന്ന് പിറന്നാള്. സിനിമ സഹപ്രവര്ത്തകര് ഉള്പ്പെടെ നിരവധി പേരാണ് താരത്തിന് ആശംസകള് നേര്ന്നത്.
കരുത്തുറ്റ ഒരുപിടി മികച്ച കഥാപാത്രങ്ങളിലൂടെ മലയാളികളുടെ മനം കവര്ന്ന നടിയാണ് മഞ്ജു വാര്യര്. സ്കൂള് വിദ്യാഭാസ കാലത്ത് തന്നെ പ്രതിഭ തെളിയിച്ച മഞ്ജു 2 വര്ഷം തുടര്ച്ചയായി കേരള സംസ്ഥാന സ്കൂള് യുവജനോത്സവത്തില് കലാതിലകമായിരുന്നു.
സാക്ഷ്യം എന്ന മലയാള സിനിമയിലൂടെ ബാലതാരമായിട്ടായിരുന്നു മഞ്ജുവിന്റെ അരങ്ങേറ്റം. പിന്നീട് പതിനെട്ടാമത്തെ വയസ്സില് സല്ലാപം എന്ന സിനിമയില് നായികാ കഥാപാത്രത്തെ അവതരിപ്പിച്ച് പ്രേക്ഷകരുടെ ഇഷ്ടനായികയായി മാറി.
‘ഈ പുഴയും കടന്ന്’ എന്ന ചിത്രത്തിലെ അഭിനയത്തിനു മികച്ച നടിക്കുള്ള സംസ്ഥാന ചലച്ചിത്ര അവാര്ഡും മഞ്ജു കരസ്ഥമാക്കി. കണ്ണെഴുതി പൊട്ടും തൊട്ട് എന്ന സിനിമയിലെ അഭിനയത്തിനു ദേശീയ ജൂറിയുടെ പ്രത്യേക പരാമര്ശവും മഞ്ജുവിന് ലഭിച്ചിട്ടുണ്ട്.
ശേഷം സമ്മര് ഇന് ബത്ലഹേം, ആറാം തമ്പുരാന്, പത്രം, ദില്ലിവാല രാജകുമാരന്, കളിവീട്, കളിയാട്ടം, കുടമാറ്റം, കൃഷ്ണഗുഡിയില് ഒരു പ്രണയകാലത്ത്, ഇരട്ടക്കുട്ടികളുടെ അച്ഛന്, പ്രണയവര്ണ്ണങ്ങള്, കന്മദം, എന്നിങ്ങനെ പോകുന്നു മഞ്ജുവിന്റെ സൂപ്പര്ഹിറ്റുകള്.
വിവാഹ ശേഷം സിനിമയില് നിന്ന് മഞ്ജു വാര്യര് ദീര്ഘകാലം ഇടവേളയെടുത്തിരുന്നു. ഒടുവില് 2014ല് പുറത്തിറങ്ങിയ ‘ഹൗ ഓള്ഡ് ആര് യു’ എന്ന ചിത്രത്തിലൂടെ ഗംഭീര തിരിച്ചുവരവ് നടത്തി സിനിമകളില് സജീവമായി. റാണി പത്മിനി, വേട്ട, ഉദാഹരണം സുജാത, വില്ലന്, ആമി, ഒടിയന്, ലൂസിഫര്, പ്രതി പൂവന്കോഴി, ദി പ്രീസ്റ്റ്, ചതുര്മുഖം തുടങ്ങിയ ശ്രദ്ധേയമായ സിനിമകളാണ് രണ്ടാം വരവില് മഞ്ജുവിനെ കാത്തിരുന്നത്.
അസുരന് എന്ന ധനുഷ് ചിത്രത്തിലൂടെ തമിഴിലും മഞ്ജു ചുവടുറപ്പിച്ചു. സിനിമയില് മഞ്ജു അവതരിപ്പിച്ച പച്ചയമ്മാള് എന്ന കഥാപാത്രം ഏറെ പ്രശംസകള് നേടി. അജിത്ത് ചിത്രം തുനിവ് ആണ് മഞ്ജു അവസാനമായി എത്തിയ തമിഴ് ചിത്രം.
Discussion about this post