ഫിഫ വേള്ഡ് കപ്പ് ഫൈനലില് ട്രോഫി അനാവരണം ചെയ്യാനെത്തിയ ബോളിവുഡ് താരം ദീപിക പദുകോണിനെ അഭിനന്ദിച്ചും പ്രശംസിച്ചും സോഷ്യല്മീഡിയയില് കമന്റുകള് നിറയുന്നു. ഇന്ത്യയിലെ വിവാദങ്ങള്ക്ക് ഇടയിലാണ് ഖത്തറിലെ ലോകകപ്പ് വേദിയില് ദീപിക തിളങ്ങിയത്.
ഇതാദ്യമായാണ് ഒരു ഇന്ത്യന് നടി ഫിഫ ലോകകപ്പ് ട്രോഫി അനാവരണം ചെയ്യുന്നത്. അര്ജന്റീന-ഫ്രാന്സ് ഫൈനലിന് മുമ്പ് പ്രത്യേകം തയാറാക്കിയ ലൂയിസ് വ്യൂട്ടണ് ട്രങ്കില് ലുസൈല് സ്റ്റേഡിയത്തില് എത്തിച്ച കപ്പ് ദീപികയും സ്പെയിനിന്റെ മുന് ക്യാപ്റ്റന് ഇകര് കസീയസും ചേര്ന്നാണ് ലോകത്തിന് മുമ്പില് അവതരിപ്പിച്ചത്.
also read: മെസ്സിയും സംഘവും മടങ്ങുന്നത് കിരീടവും 347 കോടി രൂപയുമായി: ഫ്രാന്സിന് 248 കോടി രൂപയും
ഷാരൂഖ് ഖാന് നായകനായി എത്തിയ പത്താന് എന്ന ദീപികയുടെ ഏറ്റവും പുതിയ ചിത്രത്തിലെ ഗാനം പുറത്തിറങ്ങിയതിന് പിന്നാലെയാണ് വിവാദങ്ങള് പൊട്ടിപ്പുറപ്പെട്ടത്. ചിത്രത്തിലെ ബേഷരം രംഗ് എന്ന ഗാനത്തില് ദീപിക ധരിച്ച കാവി നിറത്തിലുള്ള ബിക്കിനി ഒരു വിഭാഗത്തെ ചൊടിപ്പിക്കുകയും സിനിമ ബഹിഷ്കരിക്കണമെന്ന ആവശ്യവുമായി അവര് രംഗത്തെത്തുകയുമായിരുന്നു.
ഒരു വിഭാഗം ദീപികയെ എതിര്ത്ത് സംസാരിക്കുമ്പോള് നിരവധി ആരാധകരാണ് താരത്തിന് പിന്തുണ അറിയിച്ച് സോഷ്യല്മീഡിയയിലൂടെയും മറ്റും രംഗത്തെത്തിയത്. ഇതിനിടെയാണ് ദീപിക പദുക്കോണിന് അപൂര്വ സൗഭാഗ്യം ലഭിക്കുന്നത്. ഖത്തറിലേക്ക് പുറപ്പെടുന്നതിന് മുന്നോടിയായി ശനിയാഴ്ച വൈകീട്ട് മുംബൈ വിമാനത്താവളത്തിലെത്തിയ നടിയുടെ ചിത്രങ്ങള് പുറത്തുവന്നിരുന്നു.
Discussion about this post