ചലച്ചിത്ര താരം ഹണി റോസിനായി തമിഴ്‌നാട്ടിൽ ക്ഷേത്രം പണിത് ഒരുആരാധകൻ. ഒരു സ്വകാര്യ ചാനലിൻറെ ഗെയിം ഷോയിലാണ് ഹണി റോസ് തൻറെ പേരിൽ അമ്പലം പണിത കാര്യം വെളിപ്പെടുത്തിയത്. തന്റെ ആദ്യ സിനിമയായ ബോയ് ഫ്രണ്ട് മുതൽ സ്ഥിരമായി ഫോണിൽ വിളിച്ച് അഭിനന്ദിക്കുന്ന തമിഴ് ആരാധകൻ എല്ലാ സിനിമയും കണ്ട് അഭിപ്രായം പറയാറുണ്ടെന്നും അദ്ദേഹമാണ് ക്ഷേത്രം പണിതതെന്നും ഹണി റോസ് വെളിപ്പെടുത്തി.
തമിഴ്‌നാട്ടിലെ ഒരു ഗ്രാമത്തിൽ താമസിക്കുന്ന ആരാധകനെ പാണ്ടിയെന്ന് വിളിക്കുന്നതാണ് അദ്ദേഹത്തിന് ഇഷ്ടമെന്നും ഹണി റോസ് പറഞ്ഞു. പത്ത് പതിനഞ്ച് വർഷങ്ങളായി അദ്ദേഹം സ്ഥിരമായി കൂടെ നിൽക്കുകയെന്നത് അത്ഭുതമാണെന്നും ഹണി റോസ് മനസ്സുതുറന്നു.പത്രത്തിൽ ഒരു കുഞ്ഞുഫോട്ടോ തൻറേത് കണ്ടാലും അദ്ദേഹം വിളിക്കാറുണ്ടെന്നും ഹണി വ്യക്തമാക്കി.
തന്നോടുള്ള കടുത്ത ആരാധനയിൽ അമ്പലം നിർമിച്ചതായും അതിലെ പ്രതിഷ്ഠ താനാണെന്നും അദ്ദേഹം പറഞ്ഞതായും ഹണി റോസ് വെളിപ്പെടുത്തി. അദ്ദേഹം വിളിച്ചുപറഞ്ഞെങ്കിലും അമ്പലം നേരിട്ടോ ചിത്രത്തിലോ കണ്ടിട്ടില്ലെന്നും ഹണി റോസ് വ്യക്തമാക്കി. എല്ലാ പിറന്നാളിനും കൃത്യമായി വിളിക്കും, നാട്ടിലെ ആളുകൾക്ക് പായസം കൊടുത്തെന്നും പറയും. ഒരു പ്രത്യേക സ്‌നേഹമുള്ള മനുഷ്യനാണ് അദ്ദേഹമെന്നും ഹണി റോസ് പറഞ്ഞു
Discussion about this post