കൊവിഡ് 19 വൈറസിനെ തുടര്ന്ന് ഉണ്ടായ ലോക്ക് ഡൗണ് കാരണം ആദ്യം നിശ്ചലമായ മേഖലകളില് ഒന്നാണ് സിനിമാ മേഖല. ഇപ്പോഴിതാ സിനിമാമേഖല നേരിടുന്ന പ്രതിസന്ധി പരിഗണിച്ച് താരങ്ങളും സാങ്കേതിക പ്രവര്ത്തകരും പ്രതിഫലം കുറയ്ക്കണമെന്ന് പ്രശസ്ത സംവിധായകന് മണിരത്നം. ഒരു വെബിനാറില് റിലയന്സ് എന്റര്ടൈന്മിന്റ്സിന്റെ സിഇഒ ശിബലാശിഷ് സര്ക്കാറുമായി സംസാരിക്കുക്കവേയാണ് അദ്ദേഹം ഇത്തരത്തില് പറഞ്ഞത്.
‘സിനിമാവ്യവസായം പഴയ പടിയാവുന്നത് വരെ താരങ്ങളും സാങ്കേതിക പ്രവര്ത്തകരുമെല്ലാം തങ്ങളുടെ പ്രതിഫലം കുറയ്ക്കാന് തയ്യാറാവണം. അല്ലെങ്കില് ഈ സാഹചര്യത്തില് നിര്മ്മാതാക്കള് മുമ്പോട്ട് വരില്ല. തീയ്യേറ്ററുകളില് ആളുകള് വന്നെങ്കില് മാത്രമേ ബിഗ് ബജറ്റ് ചിത്രങ്ങളുടെ മുതല് മുടക്ക് തിരിച്ചു പിടിക്കാന് സാധിക്കൂ. അതേസമയം തീയ്യേറ്ററുകള് തുറന്നാലും ജനങ്ങള് പേടികൂടാതെ വന്നു തുടങ്ങാന് പിന്നെയും സമയമെടുക്കും. സര്ക്കാറും സിനിമയ്ക്ക് സഹായവുമായി മുന്നോട്ട് വരണം.
അതേസമയം ഒടിടി പ്ലാറ്റ്ഫോമുകള് ചെറിയ സിനിമകള്ക്ക് അനുഗ്രഹമാണ്. എന്നാലും തീയേറ്റര് അനുഭവം അവിടെ നിന്ന് ലഭിക്കില്ല. മധ്യവര്ഗ കുടുംബാംഗങ്ങളും സ്ത്രീകളുമാണ് ഒടിടി പ്ലാറ്റ്ഫോമുകളെ കൂടുതലും ആശ്രയിക്കുന്നത്. അതുകൊണ്ടു തന്നെ തീയ്യേറ്ററുകളില് വരുന്ന ആള്ക്കാരുടെ എണ്ണത്തില് കുറവ് സംഭവിച്ചിട്ടുണ്ട്’ എന്നാണ് മണിരത്നം പറഞ്ഞത്.
തന്റെ പുതിയ ബിഗ്ബജറ്റ് ചിത്രമായ ‘പൊന്നിയിന് സെല്വന്’ എന്ന ചിത്രത്തിന്റെ ചിത്രീകരണത്തെ കുറിച്ചും അദ്ദേഹം സംസാരിച്ചു. ‘പൊന്നിയിന് സെല്വന്റെ ചിത്രീകരണം പാതി വഴിയിലാണ്. പത്താം നൂറ്റാണ്ടാണ് ചിത്രത്തിന്റെ കഥാ പശ്ചാത്തലം. ആ ചിത്രത്തിന് വലിയ ആള്ക്കൂട്ടം ആവശ്യമാണ്. അതെങ്ങനെ പൂര്ത്തിയാക്കുമെന്ന് എനിക്കറിയില്ല. എന്തു തന്നെ സംഭവിച്ചാലും ഞാനത് ചെയ്തിരിക്കും. സമയം എടുക്കുമെന്നറിയാം. കൊവിഡ് വൈറസിന്റെ പശ്ചാത്തലത്തില് സിനിമാസെറ്റുകളില് വലിയ മുന്കരുതലുകള് സ്വീകരിക്കേണ്ടതുണ്ട്’ എന്നാണ് മണിരത്നം പറഞ്ഞത്.
വിക്രം, ഐശ്വര്യ റായ് ബച്ചന്, ജയം രവി, കാര്ത്തി, വിക്രം പ്രഭു, തൃഷ, ജയറാം, ഐശ്വര്യ ലക്ഷ്മി, അശ്വന് കാകുമാനു, ശരത് കുമാര്, പ്രഭു, കിഷോര്, ലാല് എന്നിങ്ങനെ വമ്പന് താരനിരയാണ് ചിത്രത്തില് അണിനിരക്കുന്നത്. കല്ക്കി കൃഷ്ണമൂര്ത്തിയുടെ നോവല് അടിസ്ഥാനമാക്കിയാണ് ചിത്രം ഒരുക്കുന്നത്. അരുള്മൊഴിവര്മ്മന് അഥവാ രാജ രാജ ചോളന് ഒന്നാമന്റെ കഥയാണ് ചിത്രം പറയുന്നത്. ലൈക്ക പ്രൊഡക്ഷനും, മണിരത്നത്തിന്റെ ബാനറായ മദ്രാസ് ടാക്കീസും ചേര്ന്നാണ് ചിത്രം നിര്മ്മിക്കുന്നത്. പതിവുപോലെ എആര് റഹ്മാന് തന്നെയാണ് ചിത്രത്തിന് സംഗീതം ഒരുക്കുന്നത്. ഗാനങ്ങള് എഴുതുന്നത് വൈരമുത്തുവാണ്.
Discussion about this post