ന്യൂഡല്ഹി: നടപ്പ് സാമ്പത്തിക വര്ഷത്തെ രണ്ടാം പാദ ആഭ്യന്തര ഉല്പ്പാദനത്തില് വന് ഇടിവ്. ജൂലൈ മുതല് സെപ്റ്റംബര് വരെയുളള പാദത്തിലെ മൊത്ത ആഭ്യന്തര (ജിഡിപി) ഉല്പ്പാദനം 7.1 മാത്രമാണ്.
ഇന്ത്യയുടെ ജിഡിപി 7.4 ശതമാനത്തിനും 7.7ശതമാനത്തിന്റെ ഇടയിലായിരിക്കുമെന്നായിരുന്നു വിവിധ റേറ്റിംഗ് ഏജന്സികളുടെ പ്രവചനം. ഗ്രാമീണമേഖലയിലെ ഉപഭോഗം കുറഞ്ഞതാണ് ജിഡിപി കുറയുന്നതിനുള്ള പ്രധാന കാരണമായി വിലയിരുത്തുന്നത്. ഉയര്ന്ന എണ്ണവിലയും തിരിച്ചടിയായി.
ജൂണില് അവസാനിച്ച് 2017-18 സാമ്പത്തിക വര്ഷത്തിന്റെ ആദ്യപാദത്തില് ജിഡിപി 8.2 ശതമാനമായിരുന്നു. ഇതാണ് 7.1 ആയി ഇടിഞ്ഞത്. ആദ്യ പാദത്തില് നിന്ന് രണ്ടാം പാദത്തില് ജിഡിപി നിരക്കില് ഇടിവ് നേരിട്ടെങ്കിലും, ഇന്ത്യ ചൈനയെക്കാള് ഉയര്ന്ന വളര്ച്ച പ്രകടിപ്പിക്കുന്ന സമ്പദ്വ്യവസ്ഥയായി ഇപ്പോഴും തുടരുകയാണ്.
കഴിഞ്ഞ വര്ഷം ഇതേസമയം രാജ്യത്തിന്റെ ജിഡിപി 6.3 ശതമാനമായിരുന്നു.
എന്നാല്, അന്ന് ഇന്ത്യന് സമ്പദ്ഘടന ജിഎസ്ടിയുടെയും നോട്ട് നിരോധനത്തിന്റെയും പ്രതിസന്ധികള് നേരിടുകയായിരുന്നു. ഉല്പ്പാദന മേഖല സെപ്റ്റംബര് പാദത്തില് 7.4 ശതമാനം വളര്ച്ച കൈവരിച്ചപ്പോള് മൈനിംഗ്, ക്വാറി മേഖലകളുടെ വളര്ച്ച 2.4 ശതമാനത്തില് ഒതുങ്ങി.
നിര്മ്മാണ മേഖലയില് 7.8 ശതമാനം വളര്ച്ചയും ഫാമിംഗ് സെക്ടറില് 3.8 ശതമാനം വളര്ച്ച നിരക്കും രേഖപ്പെടുത്തി.
Discussion about this post