കൊച്ചി: അനുവാദമില്ലാതെ അപകീര്ത്തികരമാം വിധം അധ്യാപികയുടെ ഫോട്ടോ ഒപ്പം എന്ന സിനിമയില് ഉപയോഗിച്ച സിനിമാ പ്രവര്ത്തകര്ക്കെതിരെ നഷ്ടപരിഹാരം നല്കാന് മുന്സിഫ് കോടതിയുടെ വിധി. ആന്റണി പെരുമ്പാവൂര് നിര്മ്മിച്ച് പ്രിയദര്ശന് സംവിധാനം ചെയ്ത ഒപ്പം എന്ന സിനിമയിലാണ് അധ്യാപികയുടെ ഫോട്ടോ വന്നത്. കൊടുങ്ങല്ലൂര് അസ്മാബി കോളേജ് അധ്യാപിക പ്രിന്സി ഫ്രാന്സിസ് ആണ് അഡ്വ. പി നാരായണന്കുട്ടി മുഖേന പരാതി നല്കിയത്.
പരാതിക്കാരിക്ക് ഒരു ലക്ഷം രൂപ നഷ്ടപരിഹാരവും കോടതി ചെലവായി 1.68 ലക്ഷം രൂപ നല്കാനുമാണ് ചാലക്കുടി മുന്സിഫ് എം എസ് ഷൈനിയുടെ വിധി. മോഹന്ലാല് നായകനായി അഭിനയിച്ച ഒപ്പം സിനിമയിലെ 29-ാം മിനിറ്റില് പോലീസ് ക്രൈം ഫയല് മറിക്കുമ്പോള് ക്രൂരമായി കൊല്ലപ്പെട്ട യുവതിയുടെ ഫോട്ടോ എന്ന നിലയിലാണ് പ്രിന്സി ഫ്രാന്സിസിന്റെ ഫോട്ടോ ഉള്പ്പെടുത്തിയത്.
ഫോട്ടോ അനുവാദമില്ലാതെ തന്റെ ബ്ളോഗില് നിന്ന് എടുക്കുകയായിരുന്നുവെന്ന് പരാതിക്കാരി പറഞ്ഞു. ഇത് മാനസിക വിഷമത്തിന് കാരണമായി. ഇതേത്തുടര്ന്ന് 2017 ല് ആണ് കോടതിയെ സമീപിച്ചത്. ചിത്രത്തിന്റെ നിര്മ്മാതാവ് ആന്റണി പെരുമ്പാവൂര്, സംവിധായകന് പ്രിയദര്ശന് എന്നിവര്ക്ക് പുറമേ അസിസ്റ്റന്റ് ഡയറക്ടര് മോഹന്ദാസിനെയും കക്ഷി ചേര്ത്തിരുന്നു.
ഫോട്ടോ അധ്യാപികയുടേത് അല്ലെന്നാണ് എതിര് ലക്ഷികള് വാദിച്ചത്. സിനിമയില് നിന്ന് പ്രസ്തുത ഭാഗം ഒഴിവാക്കണമെന്ന് ആവശ്യപ്പെട്ടെങ്കിലും അണിയറക്കാര് ഇതിന് തയ്യാറായില്ല. ചിത്രത്തില് നിന്ന് ഫോട്ടോ ഇപ്പോഴും നീക്കിയിട്ടില്ല.
Discussion about this post