സിയോള്: ലോകത്താകമാനം കോവിഡ് 19 വൈറസ് പടര്ന്നുപിടിച്ച് ജീവനുകള് കവര്ന്നെടുക്കുകയാണ്. അതിനിടെ മഹാമാരിയെ പിടിച്ചുകെട്ടിയെന്ന അവകാശവാദവുമായി വീണ്ടും രംഗത്തെത്തിയിരിക്കുകയാണ് ഉത്തരകൊറിയ. കോവിഡിനെ പിടിച്ചുനിര്ത്താന് കഴിഞ്ഞുവെന്ന് ഭരണാധികാരി കിം ജോങ് ഉന് പറഞ്ഞു.
കോവിഡ് വ്യാപനം തടയാന് കഴിഞ്ഞത് വലിയ സന്തോഷം നല്കുന്നുവെന്നും നിര്ദേശങ്ങള് ജനങ്ങള് അക്ഷരംപ്രതി അനുസരിച്ചതിനാണ് ഈ നേട്ടം കൈവരിക്കാന് കഴിഞ്ഞതെന്നും കിം കൂട്ടിച്ചേര്ത്തു. ഉത്തര കൊറിയയുടെ ഔദ്യോഗിക മാധ്യമമായ കെസിഎന്എയാണ് ഇക്കാര്യം റിപ്പോര്ട്ട് ചെയ്തത്.
കോവിഡിനെ പ്രതിരോധിക്കുന്നതിന് ചേര്ന്നു പ്രവര്ത്തിച്ച പാര്ട്ടി സെന്ട്രല് കമ്മിറ്റിയെയും തീരുമാനങ്ങള് അക്ഷരംപ്രതി അനുസരിച്ച ജനങ്ങളെയും കിം അഭിനന്ദിച്ചു. ലോകമെമ്പാടും ആരോഗ്യപ്രതിസന്ധി തുടരുന്നതിനിടെയും മാരകമായ വൈറസിനെ പിടിച്ചുകെട്ടാന് പകര്ച്ചവ്യാധി വിരുദ്ധ സാഹചര്യം നിലനിര്ത്താന് കിം നിര്ദേശിച്ചിരുന്നതായി കെസിഎന്എ റിപ്പോര്ട്ടില് പറയുന്നു.
അയല്രാജ്യങ്ങളില് കോവിഡ് പടര്ന്നുപിടിക്കുന്ന സാഹചര്യമായതിനാല് കഴിയുന്നത്ര മുന്കരുതലെടുക്കണമെന്നും ജാഗ്രത പാലിക്കണമെന്നും കിം നിര്ദേശിച്ചു. പകര്ച്ചവ്യാധി വിരുദ്ധ തയാറെടുപ്പുകളില് ഇളവുകള് വരുത്തുന്നത് ഒരിക്കലും ചിന്തിക്കാന് കഴിയാത്ത തരത്തിലുള്ള പ്രശ്നങ്ങള്ക്കാവും വഴിതെളിക്കുകയെന്നും കിം വ്യക്തമാക്കുന്നു.
Discussion about this post