ടോക്യോ: പാരാലിമ്പിക്സില് ജാവലിന് ത്രോയില് ഇന്ത്യയ്ക്ക് ലോക റെക്കോര്ഡോടെ വീണ്ടും സ്വര്ണ നേട്ടം. പുരുഷന്മാരുടെ ജാവലിന് ത്രോയില് എ 64 വിഭാഗത്തില് സുമിത് ആന്റിലാണ് ലോക റെക്കോര്ഡോടെ സ്വര്ണം നേടിയത്.
ഫൈനലില് മൂന്ന് തവണ ലോക റെക്കോര്ഡ് ഭേദിച്ച സുമിത് 68.55 മീറ്റര് എറിഞ്ഞാണ് മെഡല് കരസ്ഥമാക്കിയത്. ഫൈനലില് ആദ്യ ശ്രമത്തില് തന്നെ 66.95 മീറ്റര് എറിഞ്ഞ് സുമിത് ലോക റെക്കോര്ഡ് ഭേദിക്കുകയായിരുന്നു.
തുടര്ന്ന് രണ്ടാം ശ്രമത്തില് 68.08 മീറ്റര് ദൂരം കടത്തി വീണ്ടും റെക്കോര്ഡ് തിരുത്തി. ശേഷം 5ാം ശ്രമത്തിലാണ് വീണ്ടും താന് സൃഷ്ടിച്ച റെക്കോര്ഡുകള് തിരുത്തി സുമിത് 68.55 മീറ്റര് എറിഞ്ഞ് സ്വര്ണനേട്ടം കൈവരിച്ചത്. സുമിത്തിനൊപ്പം മല്സരിച്ച മറ്റൊരു ഇന്ത്യന് താരം സന്ദീപ് ചൗധരി നാലാം സ്ഥാനവും സ്വന്തമാക്കി. 62.20 മീറ്ററാണ് സന്ദീപ് ചൗധരിയുടെ നേട്ടം.
ഓസ്ട്രേലിയയുടെ മൈക്കല് ബുരിയാന് 66.29 മീറ്റര് എറിഞ്ഞ് ജാവലിന് ത്രോയില് വെള്ളിയും, ശ്രീലങ്കയുടെ ദുലന് കൊടിതുവാക്കു 65.61 മീറ്റര് എറിഞ്ഞ് വെങ്കലവും നേടി.
അതേസമയം തന്നെ പാരാലിമ്പിക്സില് ലോക റെക്കോര്ഡോടെ ഇന്ത്യന് വനിതാ ഷൂട്ടര് അവനി ലേഖര നേരത്തെ സ്വര്ണം സ്വന്തമാക്കിയിരുന്നു. പാരാലിമ്പിക്സില് സ്വര്ണം നേടുന്ന ആദ്യ ഇന്ത്യന് വനിതയെന്ന നേട്ടം കൂടിയാണ് അവനി സ്വന്തമാക്കിയത്. ഇന്ത്യ ഇതുവരെ 7 മെഡലുകളാണ് നേടിയത്.
Discussion about this post