കൊയിലാണ്ടി: തത്തയെ കൂട്ടിലിട്ട് വളര്ത്തിയതിന് വീട്ടുടമസ്ഥനെതിരെ വനം വകുപ്പ് കേസെടുത്തു. നരിക്കുനി പഞ്ചായത്തിലെ ഭരണിപ്പാറ കുടുക്കില് എന്ന വീട്ടില് നിന്നാണ് കൂട്ടിലടച്ചു വളര്ത്തുകയായിരുന്ന തത്തയെ താമരശ്ശേരി റേഞ്ച് ഫോറസ്റ്റ് ഓഫീസറും സംഘവും കസ്റ്റഡിയിലെടുത്തത്. കോഴിക്കോട് നരിക്കുനി ഭാഗത്തുള്ള വയലില് നിന്ന് കെണിവെച്ച് പിടികൂടി തത്തയെ വളര്ത്തുകയായിരുന്നു.
റെയ്ഞ്ച് ഫോറസ്റ്റ് ഓഫീസര് പ്രേം ഷമീറിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് ഫോറസ്റ്റ് സംഘം വീട്ടിലെത്തിയത്. ഫോറസ്റ്റ് റെയ്ഞ്ച് ഓഫീസറെ കൂടാതെ സെക്ഷന് ഫോറസ്റ്റ് ഓഫീസറായ കെ കെ സജീവ് കുമാര്, ബീറ്റ് ഫോറസ്റ്റ് ഓഫീസര്മാരായ നിധിന് കെഎസ്, നീതു എസ് തങ്കച്ചന്, ഡ്രൈവര് സതീഷ് കുമാര് എന്നിവരാണ് തത്തയെ കൂട് സഹിതം കസ്റ്റഡിയിലെടുത്തത്.
1972 ലെ വന്യജീവി സംരക്ഷണ നിയമ പ്രകാരം ഷെഡ്യൂള്-2 പട്ടികയില് പെടുന്നതാണ് നാട്ടിന്പുറങ്ങളില് കാണപ്പെടുന്ന മോതിരത്തത്തകള്. ഇത്തരം തത്തകളെ പിടികൂടി കൂട്ടിലിട്ട് വളര്ത്തുന്നത് ഏഴു വര്ഷം വരെ തടവും 25,000 രൂപയില് കുറയാതെ പിഴയും ലഭിക്കാവുന്ന കുറ്റമാണ്.
Discussion about this post