ആലപ്പുഴ: ജെയ്നമ്മ തിരോധാനക്കേസിലെ പ്രതി സെബാസ്റ്റ്യന്റെ കാറില് നിന്ന് ആയുധങ്ങള് കണ്ടെടുത്തു. കത്തിയും ചുറ്റികയും ഡീസല് കന്നാസുമാണ് കണ്ടെത്തിയത്. ഏറ്റുമാനൂര് വെട്ടിമുകളിലെ സെബാസ്റ്റ്യന്റെ ഭാര്യാ വീട്ടില് നിര്ത്തിയിട്ടിരുന്ന കാറിലായിരുന്നു ആയുധങ്ങള്. ഇന്നലെ രാത്രി കോട്ടയം ക്രൈംബ്രാഞ്ച് സംഘം നടത്തിയ പരിശോധനയിലാണ് കത്തിയും ചുറ്റികയും ഡീസല് കന്നാസും കണ്ടെത്തിയത്.
സെബാസ്റ്റ്യന്റെ കസ്റ്റഡി കാലാവധി ഇന്നലെ അവസാനിച്ചിരുന്നു. ഒരാഴ്ച നീണ്ട കസ്റ്റഡി കാലാവധിയില് പല തവണ ചോദ്യം ചെയ്തിട്ടും സെബാസ്റ്റ്യന് അന്വേഷണത്തോട് പൂര്ണമായും സഹകരിച്ചിട്ടില്ല. നിലവില് ഇയാളുടെ കസ്റ്റഡി കാലാവധി നീട്ടി നല്കിയിട്ടുണ്ട്.
സെബാസ്റ്റ്യനുമായി അടുപ്പമുള്ളവരുടെ വിശദമായ മൊഴി അന്വേഷണ സംഘം ശേഖരിക്കുന്നുണ്ട്. സെബാസ്റ്റ്യന്റെ ഭാര്യയുടെ മൊഴി കോട്ടയം ക്രൈംബ്രാഞ്ച് സംഘം രേഖപ്പെടുത്തിയിരുന്നു. വേണ്ടി വന്നാല് ഇവരെ വീണ്ടും ചോദ്യംചെയ്യാന് വിളിപ്പിക്കും. സെബാസ്റ്റ്യന്റെ സുഹൃത്ത് റോസമ്മയുടെ വീട്ടിലും കോഴി ഫാമിലും അന്വേഷണ സംഘം ഇന്നലെ തെരച്ചില് നടത്തിയിരുന്നു.
സെബാസ്റ്റ്യനെ അറസ്റ്റ് ചെയ്തും കസ്റ്റഡിയില് വാങ്ങിയും തെളിവെടുപ്പ് നടത്തിയും ദിവസങ്ങള് കഴിഞ്ഞിട്ടും തിരോധാന കേസുകളില് കൃത്യമായ നിഗമനത്തിലെത്താന് ക്രൈംബ്രാഞ്ചിന് കഴിഞ്ഞിട്ടില്ല. തുടക്കം മുതല് അന്വേഷണത്തോടുള്ള നിസ്സഹകരണം സെബാസ്റ്റ്യന് ഇപ്പോഴും തുടരുകയാണ്. ഉന്നത പൊലീസ് ഉദ്യോഗസ്ഥരടക്കം അടിമുടി ചോദ്യം ചെയ്തിട്ടും സെബാസ്റ്റ്യന് കുലുക്കമില്ല. പ്രതിയുടെ കസ്റ്റഡി കാലാവധി നാളെ അവസാനിക്കാനിരിക്കെ പരമാവധി തെളിവുകള് ശേഖരിക്കാനുള്ള തീവ്ര ശ്രമത്തിലാണ് ക്രൈംബ്രാഞ്ച്.
Discussion about this post