കൊച്ചി: റാപ്പര് വേടനെ പിടികൂടിയത് കഞ്ചാവ് വലിക്കുന്നതിനിടെയാണെന്ന് എഫ്ഐആര്. കഞ്ചാവ് കേസില് ഇന്നലെ പിടിയിലായ വേടനെതിരെ ലഹരി ഉപയോഗവും ഗൂഢാലോചനയും ചുമത്തി. കഞ്ചാവ് പൊടിക്കാനുള്ള ക്രഷറും ചുരുട്ടാനുള്ള പേപ്പറും ത്രാസും അടക്കം വേടന്റെ ഫ്ലാറ്റില് നിന്നും പിടിച്ചെടുത്തു. തീന് മേശക്ക് ചുറ്റും ഇരുന്ന് കഞ്ചാവ് വലിക്കുന്നതിനിടെയാണ് വേടനും സംഘവും പിടിയിലായത് എന്നാണ് എഫ്ഐആറില് പറയുന്നത്.
വേടന്റെ ഫ്ലാറ്റിലെ ഹാള് നിറയെ പുകയും രൂക്ഷ ഗന്ധവുമായിരുന്നു. ബീഡിയില് നിറച്ചും കഞ്ചാവ് വലിച്ചു. ഇവര് കഞ്ചാവ് വാങ്ങിയത് ചാലക്കുടിയിലെ ആഷിഖില് നിന്നാണെന്ന് എഫ്ഐആറില് പറയുന്നു.
കഞ്ചാവ് കൈവശം വച്ചതിന് വേടനെയും റാപ് സംഘത്തിലെ അംഗങ്ങളായ എട്ട് പേരെയുമാണ് ഇന്നലെ പോലീസ് അറസ്റ്റ് ചെയ്തത്. വേടന് പുറമെ ആറന്മുള സ്വദേശി വിനായക് മോഹന്, തിരുവനന്തപുരം കൈമനം സ്വദേശി വൈഷ്ണവ് ജി.പിള്ള, സഹോദരന് വിഗനേഷ് ജി.പിള്ള, പെരിന്തല്മണ്ണ സ്വദേശി ജാഫര്, തൃശൂര് പറളിക്കാട് സ്വദേശി കശ്യപ് ഭാസ്കര്, നോര്ത്ത് പറവൂര് സ്വദേശി വിഷ്ണു കെ.വി, കോട്ടയം മീനടം സ്വദേശി വിമല് സി.റോയ്, മാള സ്വദേശി ഹേമന്ത് വി.എസ് എന്നിവരാണ് അറസ്റ്റിലായത്.
Discussion about this post