പത്തനംതിട്ട: റാന്നിയില് കൊവിഡ് വാക്സിന് എന്ന് തെറ്റിദ്ധരിപ്പിച്ച് വയോധികയ്ക്ക് കുത്തിവെപ്പ് എടുത്ത സംഭവത്തില് പ്രതി പിടിയില്. 22 കാരനായ വലഞ്ചുഴി സ്വദേശി ആകാശിനെയാണ് പോലീസ് പിടികൂടിയത്. ഇയാള്ക്ക് മാനസിക പ്രശ്നങ്ങളുണ്ടെന്ന് സംശയിക്കുന്നതായി പോലീസ് പറഞ്ഞു. കൊവിഡ് വാക്സിന് എടുത്തനാള് മുതല് മറ്റൊരാള്ക്ക് അതേപോലെ കുത്തിവെയ്പ്പ് നല്കണം എന്ന് ആഗ്രഹം ഉണ്ടായിരുന്നുവെന്നാണ് പ്രതി പോലീസിന് നല്കിയ മൊഴി.
മരുന്ന് ഇല്ലാത്ത സിറിഞ്ച് ഉപയോഗിച്ചാണ് കുത്തിയതെന്ന് പോലീസ് അറിയിച്ചു. സ്കൂട്ടറില് പോകവേ വഴിയരികില് ചിന്നമ്മയെ ആകാശ് കണ്ടു. പിന്നാലെ റാന്നിയില് പോയി സിറിഞ്ച് വാങ്ങി തിരികെ വരുംവഴി വീട്ടില് കയറി കുത്തിവെയ്പ്പ് നടത്തുകയായിരുന്നു എന്നാണ് പോലീസ് പറയുന്നത്.
മറ്റ് ദുരൂഹതകള് ഇല്ലെന്നും പോലീസ് വ്യക്തമാക്കി. വീട്ടില് അതിക്രമിച്ചു കയറിയതിന് പുറമെ സ്ത്രീത്വതെ അപമാനിച്ചു എന്ന വകുപ്പ് കൂടി ചുമത്തിയാണ് പോലീസ് ഇയാള്ക്കെതിരെ കേസെടുത്തിരിക്കുന്നത്.
റാന്നി വലിയ കലുങ്ക് സ്വദേശി ചിന്നമ്മയെയാണ് കൊവിഡ് വാക്സിന്റെ ബൂസ്റ്റര് ഡോസെന്ന് തെറ്റിദ്ധരിപ്പിച്ച് പ്രതി കുത്തിവെപ്പ് നടത്തിയത്. വേണ്ടെന്ന് പറഞ്ഞെങ്കിലും യുവാവ് നിര്ബന്ധിക്കുകയായിരുന്നു. നടുവിന് ഇരുവശത്തും കുത്തിവയ്പ്പെടുത്തു. ഇതിനുപയോഗിച്ച സിറിഞ്ച് ചിന്നമ്മയ്ക്ക് തന്നെ നല്കി, കത്തിച്ചുകളയാന് നിര്ദേശിക്കുകയായിരുന്നു.
Discussion about this post