തൊടുപുഴ: തന്റെ കാറിൽ അയൽവാസിയുടെ വളർത്തുനായ പതിവായി മൂത്രമൊഴിക്കുന്നതിന് എതിരെ പ്രതികരിച്ചയാൾക്ക് ക്രൂരമർദ്ദനം. മർദനത്തിൽ കണ്ണിന് സാരമായി പരിക്കേറ്റതായി പുതുപ്പരിയാരം ഐറാ അപ്പാർട്ട്മെന്റിൽ താമസിക്കുന്ന ബിനോയി(48)യാണ് പരാതി നൽകിയിരിക്കുന്നത്. ഡിവൈഎസ്പിക്കാണ് പരാതി നൽകിയിരിക്കുന്നത്. അയൽക്കാരനും അയാളുടെ ബന്ധുക്കളുമായ മൂവർസംഘമാണ് ക്രൂരമായി മർദിച്ചതെന്നാണ് പരാതി.
അതേസമയം, പരാതിക്ക് പിന്നാലെ സംഭവത്തിൽ മണക്കാട് ചെള്ളുപറമ്പിൽ ബെന്നി ജോസഫിനെ(55) പോലീസ് അറസ്റ്റ് ചെയ്തിട്ടുണ്ട്. ബെന്നിയുടെ ബന്ധുക്കളായ മറ്റ് രണ്ട് പേരെ പോലീസ് തിരയുകയാണ്.
ശനിയാഴ്ച രാത്രി പത്തോടുകൂടിയാണ് കേസിനാസ്പദമായ സംഭവം. ബെന്നിയുടെ വളർത്തുനായ ബിനോയിയുടെ കാറിൽ മൂത്രം ഒഴിക്കുന്നത് പതിവായിരുന്നു. തുടർന്ന് നായയെ കെട്ടിയിടാൻ ബിനോയി ആവശ്യപ്പെട്ടു.
എന്നിട്ടും ബെന്നി നായയെ നിയന്ത്രിച്ചില്ല. വീണ്ടും നായ കാറിൽ മൂത്രം ഒഴിച്ചു. ഇത് ബിനോയി ചോദ്യം ചെയ്തിരുന്നു. ഇതിന്റെ വിരോധത്തിൽ ബെന്നിയും ബന്ധുക്കളും ചേർന്ന് തന്നെ മർദിക്കുകയായിരുന്നുവെന്നാണ് പരാതി. ഭാര്യയുടേയും മക്കളുടേയും മുമ്പിൽ വെച്ചായിരുന്നു മർദനം. സാരമായി പരിക്കേറ്റ ബിനോയി ആശുപത്രിയിൽ ചികിത്സ തേടിയിരുന്നു. ശേഷമാണ് പോലീസിൽ പരാതിപ്പെട്ടതെന്ന് ഡിവൈഎസ്പി എംആർ മധുബാബു അറിയിച്ചു.
Discussion about this post