തിരുവനന്തപുരം: തിരുവനന്തപുരം വിമാനത്താവളം നടത്തിപ്പ് അദാനിക്ക് കൈമാറുന്നതിനെതിരെ നിയമസഭയില് പ്രമേയം കൊണ്ടുവരും. മുഖ്യമന്ത്രി വിളിച്ച സര്വകക്ഷി യോഗത്തിലാണ് തീരുമാനമുണ്ടായത്. കേസില് ശക്തമായ നിലപാട് സ്വീകരിക്കണമെന്നും സര്വകക്ഷി യോഗത്തില് ആവശ്യമുയര്ന്നു.
തിരുവനന്തപുരം അന്താരാഷ്ട്ര വിമാനത്താവളത്തിന്റെ നടത്തിപ്പും മേല്നോട്ടവും അദാനി എന്റര്പ്രൈസസിനെ ഏല്പ്പിക്കാന് കേന്ദ്രമന്ത്രിസഭ എടുത്ത തീരുമാനം പിന്വലിക്കണമെന്ന് സര്വകക്ഷി യോഗം ആവശ്യപ്പെട്ടു. വിമാനത്താവളം വിട്ടുനല്കേണ്ടതില്ലെന്ന് യോഗത്തില് പൊതു വികാരം ഉയര്ന്നു. സര്വകക്ഷിയോഗത്തില് ബിജെപി ഒഴികെ എല്ലാ കക്ഷികളും വിമാനത്താവള സ്വകാര്യവത്കരണത്തെ എതിര്ത്തു. നിയമ നടപടികള് തുടരുന്നതിനൊപ്പം ഒറ്റക്കെട്ടായി ഈ വിഷയത്തില് മുന്നോട്ടുപോകാന് യോഗം തീരുമാനിച്ചു.
വിമാനത്താവളം സംസ്ഥാന സര്ക്കാരിനെ ഏല്പ്പിക്കാമെന്ന് ഉന്നതതലത്തില് സംസാരിച്ചപ്പോള് വാക്കു തന്നതാണ്. അത് മറികടന്നുപോയിരിക്കുന്നു.വിമാനത്താവളം വിട്ടുകൊടുക്കാനാകില്ല. എല്ലാവരും ഒറ്റക്കെട്ടാണ്. ബിജെപിയുടേത് സാങ്കേതിക പ്രതിഷേധം മാത്രമാണ്. കാര്യങ്ങള് മനസിലാക്കിയാല് അവരും പിന്മാറും. ഒന്നിച്ചു നിന്നാല് ഈ തീരുമാനത്തെ മാറ്റിയെടുക്കാം. നിയമസഭയില് സ്വീകരിക്കേണ്ട നിലപാടുകള് സ്പീക്കര്, പ്രതിപക്ഷ നേതാവ് എന്നിവരുമായി ആലോചിച്ച് തീരുമാനിക്കുമെന്നും മുഖ്യമന്ത്രി സര്വകക്ഷി യോഗത്തില് പറഞ്ഞു.
സംസ്ഥാന സര്ക്കാര് എടുക്കുന്ന എല്ലാ നടപടികള്ക്കും പ്രതിപക്ഷ നേതാവ് രമേശ് ചെന്നിത്തല പൂര്ണ പിന്തുണ പ്രഖ്യാപിച്ചു. ഒട്ടക്കെട്ടായി നിന്ന് നിയമസഭയില് പ്രമേയം കൊണ്ടുവരുന്ന കാര്യത്തിലും അദ്ദേഹം പിന്തുണ നല്കി. അതേസമയം എല്ഡിഎഫിന്റേയും യുഡിഎഫിന്റേയും എതിര്പ്പ് അപഹാസ്യമെന്ന് കേന്ദ്രമന്ത്രി വി.മുരളീധരന് പറഞ്ഞു. സര്ക്കാരിന്റെ എതിര്പ്പ് സ്വര്ണക്കടത്ത് കേസില് നിന്ന് ജനശ്രദ്ധ തിരിക്കാനെന്നും അദ്ദേഹം ആരോപിച്ചു. യുപിഎ സര്ക്കാര് വിമാനത്താവളങ്ങള് സ്വകാര്യവല്കരിച്ചത് അഴിമതിക്കാണോ എന്നും അദ്ദേഹം ചോദിച്ചു.
Discussion about this post