ഭുവനേശ്വര്: നാലു മാസമായി ആശുപത്രിയില് സൂക്ഷിച്ചിരിക്കുന്ന ഒഡീഷ തീവണ്ടിയപകടത്തില് മരിച്ച 28 പേരുടെ സംസ്കാരം നടത്തി. ബന്ധുക്കള് തിരിച്ചറിയാത്തതിനാല് നാലു മാസമായി ആശുപത്രിയില് സൂക്ഷിച്ചിരിക്കുകയായിരുന്നു മൃതദേഹങ്ങള്. ഭുവനേശ്വര് മുനിസിപ്പല് കോര്പ്പറേഷന്റെ നേതൃത്വത്തിലാണ് മൃതദേഹങ്ങള് സംസ്കരിച്ചത്.
സിബിഐ ഉദ്യോഗസ്ഥരുടെ സാന്നിധ്യത്തിലാണ് എയിംസ് ഭുവനേശ്വര് മൃതദേഹങ്ങള് കൈമാറിയത്. ചൊവ്വാഴ്ച വൈകുന്നേരത്തോടെ ഒന്പത് മൃതദേഹങ്ങളാണ് മുനിസിപ്പല് കോര്പ്പറേഷന് കൈമാറിയത്. ട്രെയിന് ദുരന്തമുണ്ടായ ജൂണ് മാസം മുതല് മൃതദേഹങ്ങള് ആശുപത്രിയില് സൂക്ഷിച്ചിരിക്കുകയായിരുന്നു.
അതേസമയം, രണ്ട് ദിവസത്തിനുള്ളില് സംസ്കാരം പൂര്ത്തിയാകുമെന്നാണ് പ്രതീക്ഷിക്കുന്നതെന്ന് മുനിസിപ്പല് കോര്പ്പറേഷന് അധികൃതര് വിശദമാക്കി. അപകടത്തിന് പിന്നാലെ ഭുവനേശ്വറിലെ എയിംസിലേക്ക് എത്തിച്ചത് 162 മൃതദേഹങ്ങളായിരുന്നു. ഇതില് 81 മൃതദേഹങ്ങള് ആദ്യഘട്ടത്തില് ബന്ധുക്കള്ക്ക് കൈമാറിയിരുന്നു.
ഡിഎന്എ പരിശോധനകള്ക്ക് പിന്നാലെ 53 മൃതദേഹങ്ങള് ബന്ധുക്കള്ക്ക് വിട്ടുനല്കി. എന്നാല് 28 മൃതദേഹങ്ങള്ക്ക് ഇനിയും അവകാശികളെത്താത്ത സാഹചര്യത്തിലാണ് സംസ്കാരം നടത്തുന്നത്.
Discussion about this post