മലയാളി സിനിമാ പ്രേമികൾക്ക് വലിയ നഷ്ടം സമ്മാനിച്ചാണ് ജഗതി ശ്രീകുമാർ എന്ന മഹാനടന് അപകടം സംഭവിച്ചത്. ഇനിയും പൂർണ്ണമായി ആരോഗ്യം വീണ്ടെടുത്തിട്ടില്ലാത്ത ജഗതി ശ്രീകുമാറിന്റെ ഓണസദ്യ വീഡിയോ സോഷ്യൽമീഡിയ ഏറ്റെടുത്തിരിക്കുകയാണ്. അദ്ദേഹം ഓണസദ്യ ഉണ്ണുന്ന വിഡിയോ സമൂഹമാധ്യമങ്ങളിൽ വൈറലാകുകയാണ്. ഭാര്യ ശോഭയാണ് അദ്ദേഹത്തിന് ഇലയിൽ വിളമ്പിയ സദ്യ ഊട്ടുന്നത്. മനസ് നിറയ്ക്കുന്ന ഈ വീഡിയോ പങ്കുവെച്ചിരിക്കുന്നത് സംവിധായകൻ വിനോദ് ഗുരുവായൂരാണ്.
വീഡിയോ കണ്ട നിരവധി ആരാധകരാണ് അദ്ദേഹത്തിന്റെ തിരിച്ചുവരവിനായി പ്രാർഥിച്ചും ആശംസിച്ചും കമന്റുകൾ രേഖപ്പെടുത്തുന്നത്. വളരെ പ്രസന്നവദനനായാണ് താരം വിഡിയോയിൽ കാണപ്പെടുന്നത്. ഭാര്യയും മറ്റു കുടുംബാംഗങ്ങളും ഒപ്പമുണ്ട്. ജഗതിച്ചേട്ടനെ മിസ് ചെയ്യുന്നുണ്ടെന്നും വേഗം സിനിമയിലേക്ക് മടങ്ങിയെത്തണമെന്നും ആരാധകർ പറയുന്നു.
2012ലാണ് ജഗതി ശ്രീകുമാറിന് വാഹനാപകടത്തിൽ ഗുരുതരമായ പരിക്ക് പറ്റുന്നത്. ഒരു വർഷത്തോളം ആശുപത്രിയിൽ ചികിത്സയിലായിരുന്ന അദ്ദേഹം ഇപ്പോഴും പരിക്കിൽ നിന്നും മുക്തനല്ല. താരത്തിന്റെ തിരിച്ചുവരവിനായി കാത്തിരിക്കുകയാണ് സിനിമാലോകം.
Discussion about this post