കൊച്ചി: ടിക് ടോക്കില് ലക്ഷക്കണക്കിന് ഫോളേവേഴ്സുള്ള അമ്മാമ്മ ഇപ്പോള് ആപ്പ് നിരോധിച്ചതിന്റെ വിഷമത്തിലാണ്. ഇന്ത്യയില് നിരോധിച്ച ചൈനീസ് ആപ്പ് ടിക് ടോകിനു പകരം പുതിയൊരു ആപ്പ് വേണമെന്നും ഇനിയും വീഡിയോകള് ചെയ്യണമെന്നുമാണ് 88-ാം വയസ്സിലും ഈ അമ്മാമ്മ പറയുന്നത്.
വെറുതെ ഒരു തമാശയ്ക്കാണ് പറവൂര് പൂയ്യപ്പിള്ളി സ്വദേശി മേരി ജോസഫും കൊച്ചുമകന് ജിന്സണും ടിക് ടോക്കില് വീഡിയോ ചെയ്ത് തുടങ്ങിയത്. എന്നാല് കണ്ണടച്ചുതുറക്കും മുമ്പേ അമ്മാമ്മയും കൊച്ചുമോനും ടിക് ടോക്കില് ഫെയ്മസായി മാറി.
ടിക് ടോക് ആപ്പ് നിരോധിക്കുന്നതുവരെ ഏഴര ലക്ഷം ഫോളോവേഴ്സിനേയും 1.30 കോടി ലൈക്കുകളുമാണ് അമ്മാമ്മയും കൊച്ചുമോനും നേടിയത്. ”ചട്ടയും മുണ്ടുമുടുത്ത് വീടിനുള്ളില് കഴിഞ്ഞിരുന്ന അമ്മാമ്മയുമായി പ്രളയകാലത്ത് വെറുമൊരു തമാശയ്ക്ക് തുടങ്ങിയതാണ് ടിക് ടോക്. ഒന്നര വര്ഷംകൊണ്ട് 250-ലേറെ വീഡിയോകളാണ് അമ്മാമ്മ ചെയ്തത്.” എന്ന് ജിന്സണ് പറയുന്നു.
”ലോക്ഡൗണ് കാലത്ത് തമാശ വീഡിയോകള് വേണ്ടെന്ന് അമ്മാമ്മ പറഞ്ഞിരുന്നെങ്കിലും കോവിഡ് ബോധവത്കരണവുമായി ബന്ധപ്പെട്ട് ഒട്ടേറെ വീഡിയോകള് ചെയ്തിരുന്നു. അവസാനം ചെയ്ത കാക്ക എന്ന വീഡിയോ പത്തുലക്ഷത്തിലേറെപ്പേരാണ് കണ്ടത്…”- ജിന്സണ് പറയുമ്പോള് അമ്മാമ്മ പതിവുപോലെ ചിരിച്ചു.
ലോക്ഡൗണ് കാലത്ത് അമ്മാമ്മയുടെ അഭിനയമികവ് ഉപയോഗപ്പെടുത്താന് കേരള പോലീസും എത്തിയിരുന്നു. കേരള പോലീസിന്റെ കോവിഡ് ബോധവത്കരണവുമായി ബന്ധപ്പെട്ട വീഡിയോയാണ് അമ്മാമ്മ ചെയ്തത്.
രാജ്യത്തിന് വേണ്ടിയാണ് ടിക് ടോക് നിരോധിച്ചത്. അത് നല്ല കാര്യമാണെന്നും എന്നാല് ടിക് ടോക്കിന് പകരം മറ്റൊരു ആപ്പ് വേണമെന്നും അമ്മാമ്മ പറയുന്നു.
Discussion about this post