ലളിതമായ ചടങ്ങിലൂടെ വിവാഹം പൊടുന്നനെ നടത്തി ഏപ്രില് 9 ന് ആഘോഷപൂര്വ്വം എല്ലാവരെയും ക്ഷണിച്ച് റിസപ്ഷന് നടത്താനിരുന്നതാണ് തമിഴ്നടന് യോഗി ബാബു. എന്നാല് ഇപ്പോള് എല്ലാം മാറ്റിവെച്ച് സിനിമയിലെ ജൂനിയര് ആര്ട്ടിസ്റ്റുകള്ക്ക് സഹായവുമായി എത്തിയിരിക്കുകയാണ് അദ്ദേഹം. തമിഴ് സിനിമയിലെ ജൂനിയര് ആര്ട്ടിസ്റ്റുകള്ക്ക് 1250 ചാക്ക് അരിയാണ് യോഗി ബാബു വിതരണം ചെയ്തത്.
വിവാഹം പെട്ടെന്നു നടത്തിയതിനാല് ആരെയും ക്ഷണിക്കാന് കഴിഞ്ഞിരുന്നില്ല. പകരം റിസപ്ഷന് തമിഴ്നാട് മുഖ്യമന്ത്രിയെ അടക്കം സിനിമാ മേഖലയിലെ സുഹൃത്തുക്കളെ മുഴുവന് ക്ഷണിച്ചുകൊണ്ട് ആഘോഷപൂര്വം നടത്താന് ഉദ്ദേശിച്ചിരിക്കുകയായിരുന്നു. എന്നാല്, രാജ്യത്ത് ലോക്ക് ഡൗണ് പ്രഖ്യാപിച്ച സാഹചര്യത്തില് അത് നീട്ടിവെച്ചുവെന്നും താരം വ്യക്തമാക്കി.
ലോക്ക് ഡൗണിന്റെ പശ്ചാത്തലത്തില് ഏറെ ബുദ്ധിമുട്ടുകള് നേരിടേണ്ടിവന്നത് സിനിമാ മേഖലയിലെ ദിവസവേതനക്കാരാണ്. തമിഴ് സിനിമാമേഖലയിലെ ലോക്ക് ഡൗണ് പ്രതിസന്ധികള് മറികടക്കാന് രജനീകാന്ത്, അജിത്ത്, സൂര്യ, കാര്ത്തി, തുടങ്ങിയവര് സിനിമാസംഘടനയായ ഫെഫ്സിക്ക് ധനസഹായവുമായി രംഗത്തുവന്നിരുന്നു. ഇതിനു പിന്നാലെയാണ് യോഗിയുടെയും സഹായ ഹസ്തം.
Discussion about this post