എറണാകുളം: കൊച്ചിയില്‍ ഇന്നും പുകശല്യം രൂക്ഷം. ബ്രഹ്മപുരം മാലിന്യ പ്ലാന്റില്‍ നിന്നും പുകശല്യം രൂക്ഷമായതോടെ പ്രതിഷേധവുമായി ജനങ്ങള്‍ തെരുവില്‍ ഇറങ്ങി. അര്‍ധരാത്രിയില്‍ തൃപ്പൂണ്ണിത്തറ ഇരുമ്പനം റോഡ് പ്രദേശവാസികള്‍ ഉപരോധിച്ചു. വൈറ്റില, തൃപ്പൂണിത്തുറയിലും ഇരുമ്പനത്തും രൂക്ഷമായ പുകയാണ്. ഇത് രണ്ടാം ദിവസമാണ് പുക കൊച്ചിയുടെ ഉറക്കം കെടുത്തുന്നത്.
മാലിന്യ പ്ലാന്റിന് തീപിടിച്ചത് മൂലമുണ്ടായ രൂക്ഷമായ പുക പ്രദേശവാസികളെ ആകെ ബുദ്ധിമുട്ടിലാക്കിയിരുന്നു. രാത്രി വൈകിയും പുക രൂക്ഷമായതോടെ ആളുകള്‍ക്ക് വീടിനുള്ളില്‍ കിടന്ന് ഉറങ്ങാന്‍ പറ്റാത്ത അവസ്ഥയിലായി.
റോഡ് ഗതാഗതം തടസപ്പെട്ടതോടെ കണയന്നൂര്‍ തഹസില്‍ദാര്‍ സ്ഥലത്തെത്തി സമരക്കാരുമായി ചര്‍ച്ച നടത്തി. കളക്ടര്‍ നേരിട്ടെത്തി പ്രശ്‌ന പരിഹാരത്തിന് നേതൃത്വം നല്‍കുമെന്നും ഉറപ്പ് നല്‍കി. തുടര്‍ന്ന് വെളുപ്പിനെ മൂന്ന് മണിയോടെ ഉപരോധം അവസാനിപ്പിച്ച് വാഹനങ്ങള്‍ കടത്തിവിട്ടു. എന്നാല്‍ ഉപരോധം അവസാനിപ്പിച്ചെങ്കിലും പ്രശ്‌നം പൂര്‍ണമായും പരിഹരിക്കുന്നത് വരെ സമര രംഗത്ത് തുടരുമെന്നും സമരക്കാര്‍ പറഞ്ഞു.
Discussion about this post