ന്യൂഡല്ഹി: യെമനിലെ ജയിലില് വധശിക്ഷ കാത്ത് കഴിയുന്ന മലയാളി നഴ്സ് നിമിഷ പ്രിയയുടെ മോചനത്തിന് ഇറാന് അടക്കമുള്ള രാജ്യങ്ങളുമായി ഇന്ത്യ ചര്ച്ച നടത്തുന്നു. വധശിക്ഷ നടപ്പാക്കുന്നത് നീട്ടിവെച്ചതിന് പിന്നാലെയാണ് മോചനവുമായി ബന്ധപ്പെട്ട നയതന്ത്ര ഇടപെടലുകള്ക്കായി മറ്റു രാജ്യങ്ങളുമായി ചര്ച്ച നടത്തുന്നത്.
യെമനുമായി അടുത്തബന്ധം പുലര്ത്തുന്ന രാജ്യങ്ങളുമായി നയതന്ത്ര തലത്തില് ചര്ച്ച നടത്തി നിമിഷ പ്രിയയുടെ മോചനത്തില് അനുകൂലമായ തീരുമാനത്തിന് ശ്രമിക്കുകയാണെന്നാണ് കേന്ദ്ര സര്ക്കാര് വൃത്തങ്ങള് അറിയിക്കുന്നത്.
അതേസമയം, മധ്യസ്ഥ സംഘം ഇനി യെമനിലേക്ക് പോകുന്നത് സുരക്ഷാ പ്രശ്നങ്ങളുണ്ടാക്കുമെന്നാണ് സര്ക്കാര് നിലപാട്. എല്ലാ വശങ്ങളും ഇക്കാര്യത്തില് വിലയിരുത്തും. കൊല്ലപ്പെട്ട തലാലിന്റെ കുടുംബം ആരെയും കാണാന് തല്ക്കാലം തയ്യാറാകുന്നില്ല. ഈ സാഹചര്യത്തില് മധ്യസ്ഥ സംഘത്തെ യെമനിലേക്ക് അയക്കുന്നത് വെല്ലുവിളിയായിരിക്കുമെന്നാണ് കേന്ദ്ര സര്ക്കാര് വൃത്തങ്ങള് അറിയിക്കുന്നത്.
Discussion about this post