തമിഴ് ചലച്ചിത്ര നിർമാതാവ് രവീന്ദർ ചന്ദ്രശേഖരനും നടിയും അവതാരകയുമായ മഹാലക്ഷ്മിയും അടുത്തിടെയാണ് വിവാഹ ജീവിതത്തിലേക്ക് കടന്നത്. രവീന്ദറിന്റെ തടിയും പ്രായ കൂടുതലും എടുത്ത് നിരവധി പേരാണ് താരങ്ങൾക്കെതിരെ കടുത്ത വിമർശനവും പരിഹാസവുമായി രംഗത്ത് വന്നത്.
രവീന്ദറിന്റെ സമ്പാദ്യം കണ്ടിട്ടാണ് മഹാലക്ഷ്മി വിവാഹത്തിന് തയ്യാറായതെന്നുപോലും പലരും പരിഹസിച്ചു. ഈ പരിഹാസങ്ങൾക്ക് മറുപടിയുമായി രംഗത്ത് വന്നിരിക്കുകയാണ് മഹാലക്ഷ്മി. താൻ സാമ്പത്തികമായി സ്വയം പര്യാപ്തയാണെന്നും ആദ്യ വിവാഹത്തിലെ മകനെ ഒറ്റയ്ക്ക് വളർത്താനുള്ള ആത്മവിശ്വാസവും തനിക്കുണ്ടായിരുന്നെന്നും മഹാലക്ഷ്മി വിമർശനങ്ങൾക്ക് മറുപടി നൽകി.
രണ്ടാമതൊരു വിവാഹം കഴിക്കില്ല എന്നതായിരുന്നു തന്റെ തീരുമാനമെന്നും എന്നാൽ രവീന്ദറിനെ പരിചയപ്പെട്ടതോടെ അതിൽ മാറ്റം വന്നുവെന്നും മഹാലക്ഷ്മി വെളിപ്പെടുത്തി. വിവാഹശേഷം സൺ ടിവിക്ക് നൽകിയ അഭിമുഖത്തിലാണ് താരം വിമർശനങ്ങൾക്ക് മറുപടി നൽകിയത്.
തന്റെ ഭർത്താവിന്റെ ശരീരപ്രകൃതത്തെ പരിഹസിക്കുന്നവർക്കെതിരേ നടി നേരത്തെ ഇൻസ്റ്റഗ്രാം ലൈവ് വീഡിയോയിലൂടേ പ്രതികരിച്ചു രംഗത്ത് വന്നിരുന്നു. തന്റെ ഭർത്താവിനെ എന്നല്ല, ഭാരക്കൂടുതലുള്ള ആരേയും ഇത്തരത്തിൽ പരഹസിക്കരുത് എന്നായിരുന്നു ലൈവിൽ മഹാലക്ഷ്മി ആവശ്യപ്പെട്ടത്.
തങ്ങൾ പരസ്പരം മനസിലാക്കിയ ശേഷമാണ് വിവാഹം കഴിച്ചതെന്ന് രവീന്ദർ നേരത്തെ വ്യക്തമാക്കിയിരുന്നു. രവീന്ദർ എങ്ങനെയാണോ അങ്ങനെത്തന്നെ തനിക്കിഷ്ടമാണെന്നും അദ്ദേഹത്തിന്റെ ശരീരപ്രകൃതത്തിൽ തനിക്ക് ആശങ്കയില്ലെന്നും മഹാലക്ഷ്മിയും വ്യക്തമാക്കിയിരുന്നു. 32 വയസുകാരിയായ മഹാലക്ഷ്മിക്ക് എട്ടു വയസുള്ള ഒരു മകനുണ്ട്. 2019-ലാണ് മഹാലക്ഷ്മി ആദ്യ വിവാഹബന്ധം വേർപെടുത്തിയത്.
Discussion about this post