പെരിന്തല്മണ്ണ: ശബരിമലയില് അയ്യപ്പ ദര്ശനത്തിന് എത്തിയ യുവതിയുടെ വീടിന് മുന്നില് ബിജെപിയുടെ പ്രവര്ത്തകരുടെ പ്രതിഷേധം. മലപ്പുറം സ്വദേശി കനകദുര്ഗയുടെ പെരിന്തല്മണ്ണയിലെ വീടിന് മുന്നിലാണ് ബിജെപി പ്രവര്ത്തകര് പ്രതിഷേധം നടത്തുന്നത്. അതേസമയം, കനത്ത പ്രതിഷേത്തിനിടെ പോലീസ് സംരക്ഷണയിലാണ് രണ്ട് യുവതികളും മല കയറുന്നത്.
കോഴിക്കോട്, മലപ്പുറം സ്വദേശികളാണ് ബിന്ദുവും കനകദുര്ഗ്ഗയും. 42 ഉം 44 ഉം വയസുള്ള യുവതികളാണ് ഇവര്. പുലര്ച്ചെ മൂന്നരയ്ക്ക് ഇവര് പമ്പയിലെത്തി. പോലീസിനെ അറിയിക്കാതെയാണ് ഇവര് പമ്പയിലെത്തിയത്. സുരക്ഷ നല്കണമെന്ന ആവശ്യം ഉന്നയിച്ചിട്ടുമില്ലായിരുന്നു.
എന്നാല്, യുവതികള് ആയതിനാല് മലകയറുന്നതിന് പോലീസ് സംരക്ഷണം നല്കുകയായിരുന്നു. അപ്പാച്ചിമേട്ടിലും മരക്കൂട്ടത്തും യുവതികള്ക്കെതിരെ പ്രതിഷേധം ഉണ്ടായി. എന്നാല് പോലീസ് പ്രതിഷേധക്കാരെ മാറ്റി യുവതികളുമായി മുന്നോട്ട് പോവുകയാണ്. ഡിഐജി സേതുരാമന്റെ നേതൃത്വത്തിലായിരുന്നു പോലീസ് നടപടി.
Discussion about this post