കൂടത്തായി: കൂടത്തായി കൊലപാതക കേസിലെ പ്രതികളെ പൊന്നാമറ്റം തറവാട്ടിലെത്തിച്ചുള്ള തെളിവെടുപ്പ് പൂര്ത്തിയായി. നാല് മണിക്കൂറിലേറെ നീണ്ടു നിന്ന തെളിവെടുപ്പായിരുന്നു പൊന്നാമറ്റം തറവാട്ടില് നടന്നത്. വീട്ടില് നിന്നും ഒരു കുപ്പി കിട്ടിയെന്നാണ് ലഭിക്കുന്ന വിവരം.
അതേസമയം, പൊന്നാമറ്റത്തു നിന്ന് കേസിലെ നിര്ണായക തെളിവുകള് കിട്ടിയതായാണ് സൂചന. 2002ല് അന്നമ്മയെ കൊലപ്പെടുത്തിയത് കീടനാശിനി ഉപയോഗിച്ചാണെന്ന് ജോളി മൊഴി നല്കിയിരുന്നു. ഈ കീടനാശിനിയുടെ കുപ്പിയാണോ അതോ പൊട്ടാസ്യം സയനൈഡിന്റെ കുപ്പി ആണോ എന്ന കാര്യത്തില് വ്യക്തത വന്നിട്ടില്ല.
പൊന്നമറ്റത്തെ തെളിവെടുപ്പ് പൂര്ത്തിയാക്കിയ ശേഷം മഞ്ചാടിയില് മാത്യുവിന്റെ വീട്ടില് പത്ത് മിനിട്ട് പരിശോധന നടത്തിയിരുന്നു. ഇപ്പോള് പ്രതികളായ ജോളി, മാത്യു, പ്രജുകുമാര് എന്നിവരെ ജോളിയുടെ രണ്ടാം ഭര്ത്താവ് ഷാജുവിന്റെ പുലിക്കയത്തെ വീട്ടിലേക്കാണ് കൊണ്ടുപോകുന്നതെന്നാണ് വിവരം.
ഇതിനിടെ സിലിയുടെ മരണം നടന്ന ദന്താശുപത്രിയിലും പ്രതികളെ കൊണ്ടുപോകുമെന്നും വിവരമുണ്ട്. ആറ് ദിവസം മാത്രമാണ് പ്രതികള് പോലീസ് കസ്റ്റഡിയില് ഉള്ളത്. അതുകൊണ്ട് തന്നെ പരമാവധി വേഗത്തില് അന്വേഷണം പൂര്ത്തിയാക്കാനാണ് പോലീസ് തീരുമാനിച്ചിരിക്കുന്നത്.
Discussion about this post