തിരുവനന്തപുരം: പതിനഞ്ചുകാരന്‍ കുളത്തില്‍ മുങ്ങിമരിച്ചു. നെയ്യാറ്റിന്‍കരയിലാണ് സംഭവം. കുന്നത്തുകാല്‍ സ്വദേശി അഭിനവ് ആണ് മരിച്ചത്. ഇന്ന് ഉച്ചയ്ക്ക് രണ്ടു മണിയോടെയായിരുന്നു അപകടം സംഭവിച്ചത്.
സുഹൃത്തുക്കള്‍ക്കൊപ്പം കുളിക്കാനിറങ്ങിയപ്പോള്‍ അഭിനവ് കുളത്തിലെ ചെളിക്കുഴിയില്‍ അകപ്പെടുകയായിരുന്നു. മൂന്നു സുഹൃത്തുക്കളായിരുന്നു കൂടെയുണ്ടായിരുന്നു. എന്നാല്‍ ഇവര്‍ക്കും അഭിനവിനും നീന്തല്‍ അറിയില്ലായിരുന്നു.
ചിമ്മിണ്ടി ക്ഷേത്രത്തിന് സമീപമുള്ള കുളത്തിലാണ് വിദ്യാര്‍ത്ഥികള്‍ കുളിക്കാനിറങ്ങിയത്. അഭിനവ് മുങ്ങിത്താഴുന്നത് കണ്ടതോടെ മറ്റ് കുട്ടികള്‍ നിലവിളിക്കുകയായിരുന്നു. ഇതു കേട്ട് സമീപത്തുണ്ടായിരുന്ന നാട്ടുകാര്‍ രക്ഷാപ്രവര്‍ത്തനം നടത്തി ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
നെയ്യാറ്റിന്‍കര കുന്നത്തുകാലില്‍ വിജയന്‍- കല ദമ്പതികളുടെ മകനാണ്. പത്താംക്ലാസ് വിദ്യാര്‍ഥിയാണ് അഭിനവ്. മൃതദേഹം കാരക്കോണം ആശുപത്രിയില്‍ സൂക്ഷിച്ചിരിക്കുകയാണ്.