കൊല്ലം: കൊല്ലം കടയ്ക്കലില്‍ ഫോണ്‍ വിളിച്ച് നടക്കുന്നതിനിടെ അശ്രദ്ധയില്‍ കിണറ്റില്‍ വീണയാളെ രക്ഷപെടുത്താന്‍ ഇറങ്ങിയ യുവാവും കിണറില്‍ കുടുങ്ങി. കടക്കല്‍ വട്ടപച്ച സ്വദേശി വിഷ്ണുവും സുഹൃത്ത് സുമേഷും ആണ് കിണറ്റില്‍ അകപ്പെട്ടത്. ഫയര്‍ ഫോഴ്സ് എത്തി രണ്ടുപേരെയും രക്ഷപ്പെടുത്തി. പരിക്ക് പറ്റിയ ഇരുവരെയും ആശുപത്രിയില്‍ പ്രവേശിപ്പിച്ചു.
കഴിഞ്ഞ ദിവസം രാത്രി 11 മണിയോടെ പഞ്ചായത്ത് കിണറിന്റെ വക്കില്‍ ഇരുന്ന് വിഷ്ണു ഫോണ്‍ ചെയ്യുക ആയിരുന്നു. ഇതിനിടെ വിഷ്ണു 65 അടി താഴ്ചയുള്ള കിണറ്റിലേക്ക് വീണു. ഇതുകണ്ട സുമേഷ് വിഷ്ണുവിനെ രക്ഷിക്കാന്‍ കയര്‍ കെട്ടി കിണറ്റിനുള്ളിലേക്ക് ഇറങ്ങിയെങ്കിലും കിണറില്‍ അകപ്പെട്ടുകയായിരുന്നു.
നാട്ടുകാര്‍ കടക്കല്‍ ഫയര്‍ ഫോഴ്സില്‍ വിവരം അറിയിച്ചതിനെ തുടര്‍ന്ന് ഇരുവരെയും രക്ഷപ്പെടുത്തി കടക്കല്‍ താലൂക്ക് ആശുപത്രിയിലേക്ക് മാറ്റി. വിഷ്ണുവിന്റെ ഇടത് കാലിന് പൊട്ടലുണ്ട്. സുമേഷിനു ദേഹത്ത് മുറിവേല്‍ക്കുകയും ചെയ്തു.
