മലപ്പുറം: മലപ്പുറത്ത് സ്‌കൂള്‍വിട്ട് വീട്ടിലേക്ക് പോകുന്നതിനിടെ മിന്നലേറ്റ് വിദ്യാര്‍ത്ഥിനി മരിച്ചു. കൂടെയുണ്ടായിരുന്ന രണ്ടു വിദ്യാര്‍ത്ഥിനികള്‍ക്ക് പൊള്ളലേറ്റിട്ടുണ്ട്.
നെടിയിരുപ്പ് കൈതക്കോട് പി ആലിക്കുട്ടിയുടെ മകള്‍ ഫാത്തിമ ഫര്‍സാന(15)യാണ് മരിച്ചത്. മുക്കൂട് പാലേക്കോട് പികെ മുഹമ്മദ് ഷഫീഖിന്റെ മകള്‍ പികെ ഷഹന ജബിന്‍ (15), മുക്കൂട് പുളിക്കല്‍ അലവിയുടെ മകള്‍ റിന്‍ഷിന (15) എന്നിവര്‍ക്കാണ് പരിക്കേറ്റത്.
കൊട്ടൂക്കര പിപിഎംഎച്ച്എസ്എസിലെ പത്താം ക്ലാസ് വിദ്യാര്‍ത്ഥിനികളാണ് മൂവരും. ശനിയാഴ്ച വൈകീട്ട് നാലരയോടെയാണ് അപകടം. പാലക്കാപറമ്പില്‍ വിമാനത്താവള അതോറിറ്റി ഏറ്റെടുത്ത ഒഴിഞ്ഞ പറമ്പില്‍വെച്ചാണ് മിന്നലേറ്റത്. നാട്ടുകാര്‍ ഉടന്‍ കുട്ടികളെ കൊണ്ടോട്ടിയിലെ സ്വകാര്യ ആശുപത്രിയിലെത്തിച്ചെങ്കിലും ഫാത്തിമ ഫര്‍സാനയെ രക്ഷിക്കാനായില്ല.
ഗുരുതരമായി പരിക്കേറ്റ ഷഹന ജബിനെ കോഴിക്കോട് മെഡിക്കല്‍കോളേജ് ആശുപത്രിയിലേക്ക് മാറ്റി. ഫാത്തിമ ഫര്‍സാനയുടെ മാതാവ്: ഫാരിഷ. സഹോദരങ്ങള്‍: ഫെബിന, മുഹമ്മദ് റബീഹ്, ബഹ്ജത്ത്. മൃതദേഹം മഞ്ചേരി മെഡിക്കല്‍ കോളേജ് മോര്‍ച്ചറിയിലേക്ക് മാറ്റി.