പന്തളം: പ്രമുഖ മിമിക്രി താരം ഉല്ലാസ് പന്തളം കോൺഗ്രസിലേക്ക് തിരിച്ചെത്തി. പന്തളത്ത് നടന്ന യുഡിഎഫ് തെരഞ്ഞെടുപ്പ് കൺവെൻഷനിൽ ഉമ്മൻചാണ്ടിയാണ് ഉല്ലാസ് പന്തളത്തെ ഷാൾ അണിയിച്ച് പാർട്ടിയിലേക്ക് സ്വീകരിച്ചത്.
മറ്റുപാർട്ടികളിൽനിന്ന് കോൺഗ്രസിൽ ചേർന്നവർക്കും ഉല്ലാസ് പന്തളത്തിന് ഒപ്പം കോൺഗ്രസ് നേതൃത്വം കൺവെൻഷനിൽ സ്വീകരണം നൽകി. നേരത്തെ യൂത്ത് കോൺഗ്രസ് മണ്ഡലം പ്രസിഡന്റായിരുന്നു ഉല്ലാസ് പന്തളം.
പിന്നീട്, വിമതനായി തദ്ദേശ തിരഞ്ഞെടുപ്പിൽ അന്നത്തെ കോൺഗ്രസ് നേതാവായിരുന്ന പന്തളം പ്രതാപനെതിരേ ഉല്ലാസ് മത്സരിച്ചിരുന്നു. പിന്നീട് ഈ വിഷയത്തിലുണ്ടായ തർക്കത്തെ തുടർന്ന് അദ്ദേഹത്തെ പാർട്ടിയിൽനിന്ന് പുറത്താക്കുകയും ചെയ്തിരുന്നു. പിന്നീട് ഈയടുത്ത് കോൺഗ്രസ് നേതാവ് പന്തളം പ്രതാപൻ കോൺഗ്രസ് വിട്ട് ബിജെപിയിൽ ചേർന്നതിന് പിന്നാലെയാണ് ഉല്ലാസ് പന്തളം കോൺഗ്രസിൽ തിരിച്ചെത്തിയത്.