വൈക്കം: ഗോവയിലേക്ക് യാത്ര പോയ മൂന്ന് വൈക്കം സ്വദേശികളില്‍ ഒരാളെ കാണാതായി. വൈക്കം മറവന്‍തുരുത്ത് കടൂക്കരയില്‍ സന്തോഷിന്റെയും ബിന്ദുവിന്റെയും മകന് സഞ്ജയ് സന്തോഷിനെയാണ് കാണാതായത്.
പുതുവര്‍ഷം ആഘോഷിക്കാനായിട്ടാണ് യുവാക്കള്‍ ഗോവയിലേക്ക് പോയത്. പുതുവര്‍ഷ പാര്‍ട്ടി കഴിഞ്ഞതിന് ശേഷമാണ് പത്തൊമ്പതുകാരനെ കാണാതായെന്നാണ് കൂട്ടുകാര്‍ പറയുന്നത്.
സഞ്ജയ് നാട്ടുകാരും സുഹൃത്തുക്കളുമായ രണ്ട് പേര്‍ക്കൊപ്പമാണ് ഗോവയിലേക്ക് പോയത്. ഡിസംബര്‍ 31ന് ബീച്ചിലെ ഡിജെ പാര്‍ട്ടിയില്‍ ഇവര്‍ പങ്കെടുത്തിരുന്നു.
ഇതിന് പിന്നാലെയാണ് സഞ്ജയെ കാണാതായതെന്ന് കൂട്ടുകാര്‍ പറഞ്ഞു. ജനുവരി ഒന്നിന് തന്നെ ഇക്കാര്യം ഗോവ പൊലീസിനെ അറിയിച്ചെങ്കിലും കാര്യമായി അന്വേഷിച്ചില്ലെന്ന് കൂട്ടുകാര്‍ പറയുന്നു.
also read:മുള്ളന്‍പന്നിയെ വെടിവെച്ച് കൊന്ന് കറിവെച്ച് കഴിച്ചു, ഏഴുപേര്‍ പിടിയില്‍
വിവരം ഗോവയിലെ മലയാളി സംഘടനകളെ അറിയിച്ച് അന്വേഷണം ഊര്‍ജിതമാക്കിയിട്ടുണ്ട്. യുവാവിനെ കാണാതായതുമായി ബന്ധപ്പെട്ട് കുടുംബം തലയോലപറമ്പ് പൊലീസിലും പരാതി നല്‍കിയിട്ടുണ്ട്.