കോട്ടയം: വഴിയില്‍ നിന്നും കളഞ്ഞുകിട്ടിയ സ്വര്‍ണ്ണമാല ഉടമയ്ക്ക് തിരികെ നല്‍കി മാതൃകയായി വിദ്യാര്‍ത്ഥികള്‍. കോട്ടയം ജില്ലയിലെ മുണ്ടക്കയം മുപ്പത്തിനാലാംമൈല് സെന്റ് ആന്റണീസ് ഹൈസ്‌കൂളിലെ പത്താം ക്ലാസ് വിദ്യാര്‍ഥികളാണ് മറ്റുള്ള വിദ്യാര്‍ത്ഥികള്‍ക്കും മാതൃകയായത്.
വിദ്യാര്‍ത്ഥികള്‍ പഠിക്കുന്ന അതേ സ്‌കൂളിലെ അധ്യാപികയായ ദീപാ ജേക്കബിന്റെതായിരുന്നു സ്വര്‍ണ ചെയിന്‍. സ്‌കൂള് വിട്ട് മുണ്ടക്കയത്തേക്കു മടങ്ങിവരുംവഴിയാണ് ഈ വിദ്യാര്‍ഥികള്‍ക്ക് കല്ലേപാലത്തില് വച്ച് സ്വര്‍ണ്ണ ചെയിന്‍ കളഞ്ഞു കിട്ടുന്നത്.
ആദ്യം ചെയിന്‍ കണ്ടപ്പോള്‍ മുക്കുപണ്ടം ആണെന്ന് കരുതി. വലിച്ചെറിയാന്‍ മുതിര്‍ന്നെങ്കിലും പിന്നീട് സ്വര്‍ണമായിരിക്കുമോ എന്ന് സംശയം ഉദിച്ചു. പിന്നീട് പരിശോധിച്ചപ്പോള്‍ സ്വര്‍ണമാണെന്നു മനസിലായതോടെ പിന്നെ ഒട്ടും വൈകിയില്ല. നേരെ മുണ്ടക്കയം പൊലീസ് സ്റ്റേഷനിലേക്ക് പുറപ്പെട്ടു.
ഒടുവില്‍ സ്വര്‍ണചെയിന്‍ വിദ്യാര്‍ത്ഥികള്‍ പഠിക്കുന്ന സ്‌കൂളിലെ തന്നെ യുപി വിഭാഗം അധ്യാപികയായ ദീപാ ജേക്കബിന്റേതാണെന്ന് കണ്ടെത്തി . പോലീസിന്റെ നേതൃത്വത്തില്‍ സ്വര്‍ണ്ണമാല വിദ്യാര്‍ത്ഥികള്‍ അധ്യാപികയ്ക്ക് നല്‍കി.