സന്തോഷ് ട്രോഫി കപ്പടിച്ചാൽ കേരളത്തിന് കോളടിക്കും! ഒരു കോടി രൂപ പാരിതോഷികം പ്രഖ്യാപിച്ച് ഷംഷീർ വയലിൽ

കോഴിക്കോട്: ഇന്ന് മഞ്ചേരി പയ്യനാട് സ്റ്റേഡിയത്തിൽ നടക്കുന്ന സന്തോഷ് ട്രോഫി ഫൈനലിൽ ജയിച്ചാൽ കേരള ടീമിന് ഒരുകോടി രൂപ പാരിതോഷികം. പ്രവാസി സംരംഭകൻ ഡോ. ഷംഷീർ വയലിൽ ആണ് പാരിതോഷികം നൽകുമെന്ന പ്രഖ്യാപനം നടത്തിയിരിക്കുന്നത്.

കേരളവും ബംഗാളും തമ്മിലുള്ള ഫൈനൽ മത്സരം തിങ്കളാഴ്ച വൈകിട്ട് നടക്കാനിരിക്കെയാണ് ട്വിറ്ററിലൂടെയായിരുന്നു അദ്ദേഹത്തിന്റെ പ്രഖ്യാപനം. ഡോ. ഷംഷീർ വയലിൽ വിപിഎസ് ഹെൽത്ത് കെയർ ഗ്രൂപ്പിന്റെ ചെയർമാനും മാനേജിങ് ഡയറക്ടറുമാണ്.

also read- ഹേമ കമ്മിറ്റി റിപ്പോർട്ട് പുറത്തുവിടേണ്ടതില്ല, ശുപാർശകൾ നടപ്പാക്കണമെന്നാണ് ഡബ്ല്യുസിസിയുടെ ആവശ്യം; വിവാദത്തിൽ വിശദീകരണവുമായി മന്ത്രി പി രാജീവ്

ഇന്ന് രാത്രി എട്ടുമണിക്ക് മഞ്ചേരി പയ്യനാട് സ്റ്റേഡിയത്തിലാണ് കേരളവും ബംഗാളും തമ്മിലുള്ള ഫൈനൽ മത്സരം. സന്തോഷ് ട്രോഫിയിൽ 15-ാം ഫൈനൽ കളിക്കുന്ന കേരളം ആറാം കിരീടം ലക്ഷ്യമിട്ടാണ ഗ്രൗണ്ടിലിറങ്ങുന്നത്.

ഇതിന് മുമ്പ് കേരളവും ബംഗാളും ഫൈനലിൽ ഏറ്റുമുട്ടിയത് കൊൽക്കത്തയിൽവെച്ചായിരുന്നു. അന്ന് കേരളത്തിനായിരുന്നു വിജയം. സന്തോഷ് ട്രോഫിയിൽ ഇതുവരെ 32 തവണയാണ് ബംഗാൾ കിരീടം നേടിയിട്ടുള്ളത്.