മലയാള ചലച്ചിത്ര താരം നൂറിൻ ഷെരീഫും നടനും തിരക്കഥാകൃത്തുമായ ഫഹീം സഫറും വിവാഹിതരായി. തിരുവനന്തപുരത്ത് വെച്ചായിരുന്നു വിവാഹച്ചടങ്ങ്. ദീർഘനാളത്തെ പ്രണയത്തിന് ശേഷമാണ് ഇരുവരുടേയും വിവാഹം. കഴിഞ്ഞ ഡിസംബറിലായിരുന്നു ഇരുവരുടേയും വിവാഹനിശ്ചയം.
വിവാഹചടങ്ങിൽ അടുത്ത ബന്ധുക്കളും സുഹൃത്തുക്കളും സെലിബ്രിറ്റികളും ഉൾപ്പെടെ നിരവധി പേരാണ് പങ്കെടുത്തത്. സിനിമയിലെ നൂറിന്റെ അടുത്ത സുഹൃത്തുക്കളായ അഹാന കൃഷ്ണ, രജിഷ വിജയൻ, പ്രിയ വാര്യർ തുടങ്ങിയവർ വിവാഹത്തിനെത്തി.
നൂറിനും ഫഹീമും സിനിമാ സെറ്റിൽ വെച്ചാണ് പരിചയപ്പെടുന്നത്. അതിനുശേഷം അടുത്ത സുഹൃത്തുക്കളായി മാറുകയായിരുന്നു. പിന്നീട് സൗഹൃദം പ്രണയത്തിലേക്കെത്തുകയും വിവാഹം നിശ്ചയിക്കുകയുമായിരുന്നു.
കൊല്ലം സ്വദേശിനിയായ നൂറിൻ നർത്തകി കൂടിയാണ്. 2017-ൽ ഒമർ ലുലു സംവിധാനം ചെയ്ത ചങ്ക്സ് എന്ന ചിത്രത്തിലൂടെയാണ് നൂറിൻ സിനിമാലോകത്ത് എത്തിയത്. പിന്നീട് ഒരു അഡാർ ലൗ എന്ന സിനിമയിൽ നായികയായെത്തി.
സാന്താക്രൂസ്, വെള്ളേപ്പം, ബർമൂഡ തുടങ്ങിയവയാണ് മറ്റു ചിത്രങ്ങൾ. തിരുവനന്തപുരം സ്വദേശിയായ ഫഹീം സഫർ മധുരം എന്ന ചിത്രത്തിലൂടേയാണ് ശ്രദ്ധിക്കപ്പെടുന്നത്. ഇതിൽ താജുദ്ദീൻ എന്ന കഥാപാത്രത്തേയാണ് ഫഹീം സഫർ അവതരിപ്പിച്ചത്. ഒപ്പം ഇതിന്റെ തിരക്കഥയിലും പങ്കാളിയായി. ജൂൺ, മാലിക്, ഗാങ്സ് ഓഫ് 18 എന്നീ ചിത്രങ്ങളിലും വേഷമിട്ടു.