ബംഗളൂരു: ബംഗളൂരുവില്‍ നിന്ന് കണ്ണൂരിലേക്ക് വില്‍പ്പനയ്ക്കായി കൊണ്ടു വന്ന
ഒമ്പതു കിലോ കഞ്ചാവുമായി നാലുപേര്‍ പിടിയില്‍. കുപ്രസിദ്ധ കഞ്ചാവ് കേസ് പ്രതി കതിരൂര്‍ മേറ്റുമ്മല്‍ ആര്‍ഷബീര്‍ (32), ചെറുവത്തൂര്‍ സ്വദേശികളായ കെസി ഷിജിത്ത്(28), ടികെ ഉമേഷ് (29) കണ്ണൂര്‍ ആദികടലായി സ്വദേശി കെകെ ഷഹീദ് (22) എന്നിവരാണ് പിടിയിലായത്.
കണ്ണൂര്‍ പോലീസ് മേധാവിക്കു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ താവക്കര ഐഒസി പെട്രോള്‍ ഡിപ്പോയ്ക്കു സമീപത്തുവെച്ച് കണ്ണൂര്‍ ടൗണ്‍ എസ്‌ഐ ശ്രീജിത്ത് കൊടേരിയും സംഘവും നടത്തിയ പരിശോധനയിലാണ് കഞ്ചാവ് പിടികൂടിയത്.
ഇന്നു രാവിലെ ബംഗളൂരില്‍ നിന്നും എത്തിയ ബസില്‍ നിന്നിറങ്ങിയ നാലുപേരും പ്ലാസ ജംഗ്ഷനില്‍ ഇറങ്ങി സിറ്റി ഭാഗത്തേക്ക് നടന്നു വരുമ്പോഴാണ് പോലീസ് പിടികൂടിയത്. മൂന്നു ബാഗുകളിലായി കഞ്ചാവ് കെട്ടുകളിലാക്കി സൂക്ഷിച്ച നിലയിലായിരുന്നു. പ്രതികളെ തെളിവെടുപ്പിനായി കൊണ്ടുപോയി. തുടര്‍ന്ന് കോടതിയില്‍ ഹാജരാക്കും.