തൃശൂര്: തൃശ്ശൂരിൽ സുഹൃത്തിൻ്റെ വെട്ടേറ്റ് 42കാരന് ദാരുണാന്ത്യം. വടക്കാഞ്ചേരി റെയില്വെ ഗെയിറ്റിനു സമീപം താമസിക്കുന്ന അരിമ്പൂര് വീട്ടില് സേവ്യർ ആണ് മരിച്ചത്.
പ്രതി വിഷ്ണു ഒളിവിലാണ്. കഴിഞ്ഞ ദിവസം അർധരാത്രിയിലായിരുന്നു സംഭവം. മൂവരും സുഹൃത്തുക്കള് ആണ്. കാവിലുണ്ടായ വഴക്കിനെത്തുടര്ന്നാണ് കൊലപാതകം നടന്നത്. സേവ്യറിന് ഒപ്പമുണ്ടായിരുന്ന സുഹൃത്ത് അനീഷിനും വെട്ടേറ്റു.
സേവ്യറും, സുഹൃത്ത് അനീഷും വടക്കാഞ്ചേരി പഴയ ഗെയ്റ്റിന് സമീപത്തുള്ള വിഷ്ണുവിന്റെ വീട്ടിലേക്ക് എത്തുകയായിരുന്നു. തുടർന്ന് വിഷ്ണുവിനെ വീടിനു പുറത്തേക്ക് വിളിച്ചിറക്കി.
പിന്നാലെ മൂവരും തമ്മില് വാക്ക് തര്ക്കമായി. ഇതിനിടെ വിഷ്ണു കയ്യിലുണ്ടായിരുന്ന കത്തി ഉപയോഗിച്ച് സേവ്യറിനെയും അനീഷിനെയും വെട്ടുകയായിരുന്നു.
ആക്രമണത്തില് സേവ്യറിന്റെ നെഞ്ചിലും വയറിലും ഗുരുതര പരിക്കേറ്റു. അനീഷിന് കഴുത്തിലും തലയിലും, കയ്യിലും മുറിവ് ഉണ്ട്. രണ്ടുപേരെയും മെഡിക്കല് കോളജ് ആശുപത്രി എത്തിച്ചുവെങ്കിലും ചികിത്സയ്ക്കിടയില് ബുധനാഴ്ച രാവിലെ സേവ്യര് മരിച്ചു.